Россия почтасынынъ куьни шилле айынынъ экинши каты куьнинде 1994-нши йылдан алып белгиленеди. Бу байрам почта куллыкшыларынынъ тыныш болмаган куллыгын, соны ман бирге почта байланысынынъ элимиз эм онынъ гражданлары уьшин керекли эм маьнели экенин коьрсетеди.
Аьлиги информационлык технологиялар заманында да почтадынъ куллыгы тек керекли болып калмайды, оннан оьзгелей бу куьн-лерде почта куьшли эм тез оьрленеди. Почта куллыкшыларына коьмекке янъы технологиялар келедилер. Олар болса почтады тез эм тийисли кепте еткермеге амал бередилер. Почта байланысынынъ бу- йымлары ман пайдаланатаганлар онынъ йылдан-йылга заманга келисли эм онъайлы болатаганын сезбей болмайдылар.
Ызгы йыллар Россия Почтасынынъ АО Терекли-Мектеб ОПС-да да туьрленислер болдылар. Мунда эки йылдан бери Почта-Банк белсенли аьрекетлейди. Соны ман бирге яшавшыларга кредитлер бериледи. 2019-ншы йылдан алып 500-ден артык карталар ашылган физический лицолар ман бирге юридический лицолар да канагатлавга косылганлар. Соьйтип, юз мынъ маьнет акшага дейим кредитли «Почтовый экспресс» картасы бериледи.
– Элимиздинъ гражданларынынъ яшавына, солардынъ сырасында бизим район яшавшыларынынъ да Почта Банкынынъ продукциясы белсенли киреди. Почта-Банк тийисли тыншаювга шыкканларды да, кыйын ак алатаганларды да, булай аьдемлерди де канагатлайды. Почта боьлигинде банкомат ашар уьшин онынъ карталарын кулланатаган аьдемлердинъ саны 1000-нен артык болмага тийисли, бизде сол кадер йок. Карталары болган 500 аьдем аьли Кизляр каласындагы Почта-Банк банкоматыннан акша шешип аладылар. Картадан болса бир йорыктан 500 мынъ маьнет акшага дейим шешип алмага болады, – деп хабарлайды Россия Почтасынынъ АО Терекли-Мектеб ОПС етекшиси Мадина Абдулалимова аьрекети акында. Ол Почта боьлигин 2019-ншы йылдан алып етекшилейди. Мадина Мусаевнадынъ айтувы ман, мунда яваплы, оьзининъ исин ийги билген, келген аьдемлер мен аьллесип болган куллыкшылар ислейдилер. Оннан оьзгелей, олар дайым бир-бирине ярдамын этпеге аьзирлер, аьр ким де оьзининъ исиннен оьзге йолдасындыкын да толтырып бажарады. Россия Почтасынынъ АО Терекли-Мектеб ОПС-да баьриси 9 почтальон аьрекетлейди. Олардынъ доьртеви Майра Абдулжалиева, Марина Адильгереева, Аида Амитова, Тойбике Шураева Терекли-Мектеб авылын канагатлайдылар. Почтальонлар сырасында – «Почта байланысынынъ мастери» медали мен савгаланган Майра Абдулжалиева. Солай ок боьликте Зульфия Исмаилова эм Мухминат Максутова аьрекетлейдилер. Ийги иси уьшин М.Максутова ДР Оькиметининъ Сый грамотасы ман савгаланган. Почтальонлардынъ аьр бириси яшавшыларды газеталарга язылув исинде белсенли катнасадылар. Газеталар эм журналларга язылув планын да боьлик куллыкшылары артыгы ман толтырганлар. Мадина Абдулалимова белгилегенлей, районымыздынъ ясы уьйкенлери сырасында газеталар эм журналларга язылатаганлар аз тувыл.
Почтальонлардан оьзге, куллыкшылар посылкалар, бандерольлар, телеграммалар эм баска корреспонденцияды алып, аьзирлейдилер. Коьп хатлар эм бандерольлар судлардан, прокуратурадан йибермеге аькеледилер. Олардынъ саны айда 1 мынъга дейим де етеди.
Куллыгында ийги коьрсетимлер уьшин Ногай районындагы Кизляр почтамтынынъ Терекли-Мектеб почта байланысынынъ боьлиги 2019-ншы йылда энъ де ийги боьлик эсабында савгаланган.
Ийги иске йогары белги берилуьв дайым да суьйиндиреди эм боьтен де куьшли шалысувга демевлик этеди. Сога коьре Россия Почта АО Терекли-Мектеб ОПС-нынъ етекшиси оьзининъ куллыкшыларынынъ ийги исин байрамларда Сый грамоталар эм баргылар ман белгилейди. Бу йыл кеспи байрамы куьнинде эм шалыскыр иси уьшин операционист Зульфия Исмаилова, почтальонлар Марина Адильгереевага, Тойбике Аллабергеновага, Айгуль Мутаировага етекшисининъ талаплавлары ман «село Терекли-Мектеб» СП МО администрациясыннан Сый грамоталар тапшырылаяк.
Почта боьлигининъ куллыкшыларын биз кеспи байрамы ман кутлап, куллыгында уьстинликлер йораймыз. Дайым да газеталарды эм журналларды куьтетаганлар коьп болсын.
Н.Кожаева.
Суьвретте: Россия Почтасынынъ АО Терекли-Мектеб ОПС куллыкшылары.
