Дагестан Республикасынынъ бас каласында Газпром компаниясынынъ эм Дагестан Оькиметининъ ваькиллери араларында йолыгыс озды. Йолыгыстынъ барысында ДР Аькимбасы Сергей Меликов, Газпром ваькиллери Виталий Маркелов эм Сергей Густов журналистлердинъ соравларына явап бердилер.

Виталий Маркелов журналистлердинъ соравларына явап бере келип, бу куьнлерде этилетаган куллыклар баьриси де Россия Федерациясынынъ Президенти Владимир Путиннинъ тергевлери астында заманы ман эм йогары дережеде этилинетаганын билдирди. Солай ок, Россия Федерациясынынъ Президентининъ аьризелерин толтырув уьшин, Дагестан Республикасынынъ Оькиметининъ, «Газпром» ПАО эм баска боьликлер араларында макулласув эм тил бирлик болмага керек. Келген конакларды ДР Аькимбасы Сергей Меликов «Газпром» ПАО етекшилерине оьз разылыгын билдирди эм Правление председатели Алексей Миллерди Ис Баьтири деген атты казанганы ман эм мерекеси мен кутлап кетти.
Сергей Меликовтынъ билдируьвине коьре, Дагестан Республикасында бу куьнлерде 11 район коьгилдим отын кулланмайды, сонынъ бас себеби – уьйлер эм солар курылган ерлер, яшайтаган аьдемлер мен байырлыкка коьширилмегени. Сондай документсиз коьгилдим оты уьйлерге еткерилип болмайды.
– Бу ерде биз яшавшылардынъ турак уьйлерине олардынъ байырлыгын коьрсеткен документлерди аьзирлеп болмаймыз. Сонынъ уьшин, баьри зат та ти- йислисинше, оьз йорыклары ман юрмеге керек. Солай болганда, биз Россия Федерациясынынъ алдышы субъектлери мен, инфраструктурасы оьрленгенлер мен бир сыдырада болмага боламыз, – деди Сергей Меликов. Йолыгыстынъ барысында «Газпром межрегионгаз» ООО генеральный директоры Сергей Густов йыйылганларга, аьли уьшин кулланылатаган коьгилдим оты уьшин тоьленетаган ак акында айтып, тезден ортак тоьлев документи болаягын билдирди.
Солай ок, ол «Газпром» куллыкшыларынынъ бас борышы – республика яшавшыларын коьгилдим оты ман канагатлав. Тийисли йорыклар тутылса, Дагестан Республикасы инфраструктурасы йогары дережедеги Россия регионларынынъ санында болар.