Ногай районынынъ орталыгы – Терекли-Мектеб авылында «Меним Дагестаным – меним йолларым» деген приоритетли проектти яшавга шыгарув ниет пен йолларды ярастырув ислер юритиледи, бу проект 2019-ншы йылдан алып аьрекетлейди. Аьлиги заманда сондай куллыклар ногай шаири Гамзат Аджигельдиевтинъ атындагы орамда юритиледи.

Ногай районынынъ «ДЭП-29» етекшиси Джамбулат Караевтинъ айтувы ман, бу орамда тротуар салынаяк.
– Бу орамда автокоьликлер бир якка карап юрсе де, юрис коьп болады. Окувшылар коьп узак тувыл ерде орынласкан мектебке бу орам ман шыгадылар, сога коьре олардынъ йолы кавыфлы болады. Курыклардынъ йогарындагы электроярыклар да янъыдан салынса экен, балаларга каранъада уьйге кайтпага аьруьв болаяк эди. «Меним Дагестаным – меним йолларым» проекти бойынша Ногай районынынъ ишиндеги йоллар ярастырылаяклар, – деп айтты ол.