Догазификациядынъ программасынынъ иштелигин кыскаша булай белгилемеге болады: эгер авылга газопровод тартылган болса, коьгилдим оты аьр бир уьйге еткерилуьв керек.

Президент Владимир Путин 2021-нши йылдынъ коькек айында РФ Федераллык Йыйынына каратылган язбасында 2023-нши йылга дейим газ тартылган авылларда коьгилдим отын аьр бир уьйге, яшавшылардан акша алмай, тегин еткермеге тапшырган. Онынъ сырагысында догазификация программасы туьзилген. Ногай районда газификациядынъ барысы, догазификация программасы акында Ногай районынынъ эксплуатациялык газ службасынынъ устасы Суюнбек Отевалиев хабарлайды: «Алдын яшавшылар энъ де коьп карыжды, ортак газ трубадан алып оьзининъ участогына дейим коьгилдим отын еткеруьвге шыгаратаган болганлар. Биревлерге газопроводты узак ерге тартпага да керекли болган. Солай ок аьдемлер кагытлар туьзетуьвге де акша шыгарганлар. Эндигиден армаган бу куллыклар тегин этилинееклер. Яшавшыларга газопроводты тек оьз азбарыннан алып уьйине дейим тартпага керек болады. Оьз уьйине коьгилдим отын тартпага суьйген аьдемлер бас деп аьризе аьзирлев керек. Аьризеди онлайн яде МФЦ-да, солай ок Ногай районынынъ эксплуатациялык газ службасына бермеге болады. Солардынъ ишинде, аьзирлеген аьризеди Ногай районынынъ эксплуатациялык газ службасына аькелсенъиз яхшы. Сонъ биз тийисли кагытлар ман бирге аьризеди алып, эсапка саламыз. Оннан сонъ, «Газпром газраспределение Дагестан» ООО-сы ман келуьсуьв туьземиз. Бу куьнге яшавшылардан 112 аьризе алынган, 110 келисуьв туьзетилген. Ногай районында догазификация бойынша куллыклар тезден басланаяклар. Н.Кожаева.