Уьстимиздеги юма басында Дагестан Республикасынынъ Аькимбасы Сергей Меликов актуальли соравлар бойынша озгарган кенъес барысында депутатларды яшавшылар арасында анълатув куллыклар юритпеге шакырды. Онынъ соьзлери мен, халк пан сайланган кайбир депутатлар толы болмаган мобилизация кампаниясынынъ басыннан алып ваькиллиги болган районларына да бармаганлар. – Депутатлар аьдемлер касында болмага, оларга оьз ягыннан коьмек этпеге, анълатув ислер юритпеге тийислилер, – деди ол.

Сонда республика етекшиси дагестан парламентининъ спикери Заур Аскендеровты бу исте белсенлик пен ортакшылык этетаганын белгиледи. Ол оьзи аьскершилердинъ йыйылув эм кесек заман турув пунктында (Шали еринде), аьскерлик борышын толтырувга шакырылганды аьзирлев пунктында (Калиновская станицасы) болган.
Солай ок Сергей Меликов толы болмаган мобилизация РФ Президентининъ Указы ман келисте озгарылмага керегин кезекли кере эске салды. – Толы болмаган мобилизация кампаниясына оьзлерининъ байыр кызыксынувлары уьшин туьрленислер киритилмеге ярамайды, – деди С.Меликов муниципаллык туьзилислер аькимбасларына каратылган соьзинде.