Янъыларда Дагестан Республика прокурорынынъ орынбасары Марат Сайпулаев Ногай районында болып, онынъ яшавшылары ман аьллесип, кайбиревлерининъ кызыксындырган соравларына яваплаган. Ол соравлар берилетаган турак-коммуналлык буйымлар толтырылувынынъ сапатлыгы, автомобиль йолларын саклав тийисли дережеде тувыллыгы, ерли самоуправление органларынынъ ортак принциплерин уйгынлав акында законодательствосын яшавга шыгарув эм сондай баска соравлар ман байланыслы эди.

Айырым айтканда, Кумлы авыл яшавшысы Зейнадулла Менлиалиев авыл эм район орталыгы ара йоллары кум басылып, ийги аьллерде тувыл экенин белгиледи. А Карагас авыл яшавшысы авылда сув канагатланув йоклыгы акында айтты.
Оннан баска болып, Марат Сайпулаев яшаган ерлери бойынша Калинин- аулдан район орталыгына саьбийлерин балалар бавына юргистуьв уьшин коьшкен аьелде, 1-нши туьрким сакатлыгы болган Терекли-Мектеб авыл яшавшысынынъ уьйинде болды. Бес балалы ана оьз саьбийлерин яшаган ери бойынша школага дейимги учреждениеге ерлестируьвге, сакатлыгы бар авыл яшавшысы, кереккенде, гемодиализди озгарув уьшин Кизляр каласына барувды уйгынламага демевлик этпеге тилек салдылар.
Солай ок республика прокурорынынъ орынбасары яшавшылардынъ законодательстводы яшавга киритуьв мен байланыста кызыксындырган соравлары бойынша анълатувлар этти эм толысынша яваплады.
Сол куьн Марат Сайпулаев Ногай район орталык больницасында да болды эм бу медучреждение коллективи мен йолыгысты, сонынъ барысында онынъ куллыкшылары ман оларды кызыксындырган соравлар бойынша анълатувлар этти, район прокуратурасы ярдамы ман каралган соравлар бойынша оьз ойларын тийислисинше кеплеп, йибермеге маслагат берди.
Солай ок республика прокурорынынъ орынбасары район прокурорынынъ ис борышларын толтырувшы А. Дильманбетовка Ногай районынынъ аьр яшавшысы берген соравлар ман байланыслы маьселели аьллерди оперативли эм тезлик пен шешуьв уьшин тийисли тапшырмалар берди. Йогары дережели ис орынындагы аьдем мен аьллесуьвде орын тапкан соравлар тергев астына салынган.