Караша айынынъ 28-нши куьнинде Ана куьни белгиленеди.
Ана – ол аьр бир тилинде энъ маьнели эм бас соьз болады. Тезден биз энъ бас, аьр бир аьдем уьшин маьнели болган байрамларынынъ бириси – Ана куьнин хош аламыз. Ана бизим аьр кайсымызга да яшавды савгалаган, бизге яшав бойы юрек йылувын берип, кыйын заманларда бизди коршалап, аьр бир етимисимизге суьйинип, куьезленип келеди.
Сол байрамга рас барып, мен Ногай районынынъ Ленинаулынынъ коьп балалы уьйкен аьели акында хабарламага суьемен. Алихан ман Зарбике Джумандыковлар асылы ман Ленинаулыннан боладылар. Сол аьелдинъ яшавы Ногай шоьлиндеги аьеллерден баскаланмайды. Олар коьплеген ногай аьеллериндей болып, яшав аьллерин ийгилендируьв мырат пан элимиздинъ бас каласы Москвада 9 йыл узагы куллык этип яшап келдилер. 2017-нши йыл яс аьел тувган Ногай районына кайтады. Джумандыковлардынъ татым аьелинде алты аьвлетлери оьсип тербияланадылар. Алимхан, Имамхан, Махди, Дамир, Самида, Умида Зарбике аналарынынъ куьезин арттырып, наьсибин оьстирип келедилер. Бу аьел тагы да оьсти, олай дегеним, Джумандыковлардынъ тунгышы Алимхан ман Имамхан увыллары уьйленип, яс аьел курганлар. Буьгуьнлерде Алихан ман Зарбике биринши уныкларын саклайдылар. Алимхан ман Имамхан буьгунлерде Георгиевск каласында кеспили колледждинъ МЧС факультетининъ студентлери боладылар. Тезден олар колларына кеспи шайытламаларын алып, суьйген кеспилери бойынша куллык этпеге мыратланадылар.
Наьсипли ана Зарбике мектебти окып битиргеннен сонъ, Хасавюрт педагогикалык училищесининъ Терекли-Мектебтеги боьлигине туьсип, оны етимисли тамамлаган. Болса да, аьел бийкеси оьз кесписи бойынша куллык этпесе де, уьйкен аьелдинъ татымлыгын беркитип, эри Алихан ман бирге саьбийлерди оьстирип, аягына салып келедилер.
Зарбике – энъ наьсипли ана, а оннан уьйкен кеспи, менимше, йок. Онынъ яшавынынъ маьнеси – саьбийлери, олардынъ келеектегиси. Алимхан увылы мал карав ман каьрлемеге суьеди, экинши увылы Имамхан домбырада ойнамага аваслыгы бар, Махди йырлав оьнери мен баскаланады. Зарбике аьвлетлерининъ аьр бир етимисине куьезленип, окувда, яшавда коьрсеткен уьстинликлерине суьйинип келеди. Саьбийлер аьелде куллыксуьерлиги, окувга аваслыгы ман кишкейлери, балалар бавында белсенли катнасувы ман баскаланып келедилер. Олар анасы ман атасына уьй куллыкларын этпеге ярдамласып, аьр кайсы етимиси мен анасын суьйиндирмеге шалысадылар. Сол тувылма ана уьшин уьйкен наьсип!
Савлайроссиялык Ана куьнине рас барып, биз уьйкен аьелдинъ бийкеси, наьсипли ана Зарбикеди ак юректен байрам ман кутлаймыз. Бу авыр заманда ога эм онынъ уьйкен татым аьелине берк ден савлык, наьсип, баьри яшав онъайлыгын йораймыз.
Г.Нурдинова.
Суьвретте: З.Джумандыкова кызлары ман.
