Бопай Амербий кызы Джемакулова алыс сырт якларга 1983-нши йылдынъ басында келген. Оьзининъ ис аьрекетин кыскаяклы Янъы Уренгой каласындагы «Руслан» балалар бавында медсестра аьрекетиннен баслады. Сол ок балалар бавын ол 1993-нши йылдан алып етекшилеп келеди. Бопай Амербий кызынынъ етимисли етекшилиги аркалы 2015-нши йылдан алып билимлендируьв ошагы «Формирование межнациональной толерантности детей дошкольного возраста в поликультурном пространстве» деген тема бойынша янъы майданы болып келеди. Бопай Амербий кызы белсенли яшав аьрекетин юритуьви мен муниципаллык билимлендируьв тармагынынъ оьрленуьвинде, Янъы Уренгой каласынынъ социал-ямагат яшавынынъ актуальли маьселелерин шешуьвде маьнели косымын этип келеди. Бопай Джемакулова таьвесилмес кайратлыгы болган аьдем, савлай яшавын тувган ис коллективине, онынъ янына якын болган Янъы Уренгой яс калашылардынъ тербиялавына багыслап келген. 2018-нши йылда «Ногай Эл» миллет маданият автономиясы «Руслан» балалар бавынынъ ис коллективи мен бирге «Навруз байрам» деген социаллык ягыннан маьнели проектин яшавга шыгарды. Кала яшавшыларды эм конакларды бес ногай аьдетлери мен таныстырдылар. Сол ок йыл «Руслан» балалар бавы эм «Ногай Эл» миллет-маданият автономиясы биргелес куллык этуьв бойынша келисуьв беркиттилер. Соннан алып туьрли шараларды бирге озгарып келедилер.
Оьсип келетаган несилди гражданлык эм патриотлык ягыннан тербиялав мырадта, 2021-нши йылда «Ногай Эл» миллет маданият автономиясы ман «Енъуьв баьрисине де бир» деген проекти яшавга шыгарылды. Байрам концертинде он ямагат организациялары ортакшылык эттилер. «Руслан» балалар бавынынъ ис коллективи «Уьш танкистлер» деген йырын алты тиллеринде етимисли йырлады.
Россия еринде яшайтаган халклар, миллетлер эм динлер ара катнаслары бойынша соравы кайсы заманларда да актуальли болып калады. Бопай Амербий кызынынъ баславы ман оьз тербиялавшыларда шыдамлыкты тербиялав бойынша семинарлар озгарылады.
Билимлендируьв ошагында баслангыш кадет куьплери де туьзилгенлер. 2022-нши йылдынъ карагыс айында «Руслан» балалар бавында «Стерхи» яс кадетлери мен «Вымпел-Ямал» орталыгынынъ етекшиси Александр Владимирович Сергиенко эм Москва каласынынъ «Вымпел» орталыгынынъ етекшиси Святослав Дмитриевич Омельченко ман йолыгыс оьткен. Бопай Джемакулова миллетлер, халклар эм динлер ара макулласувлыктынъ белсенли таралтувшысы болып Янъы Уренгой каласынынъ «Ногай Эл» миллет-маданият автономиясынынъ ис аьрекетинде белсенли катнасып келеди.
Ол аьскер-патриотлык ис аьрекети уьшин «Вымпел» куьбининъ ветеранлар Ассоциация организация куьбининъ Сый грамотасына тийисли этилген. Мектебке дейим билимлендируьв ошагында Бопай Амербий кызынынъ етекшилиги мен оьз негизинде аьел баалыклары болган коьплеген шаралары озгарылып келедилер. Сондай шаралар аьдемлер арасында эм аьел ишинде аьдемшиликтинъ ийги катнасларын кеплендирип келеди. Балалар бавында саьбийлерде халк аьдетлерин, патриотизм сезимин эм анъ байлыгын тербиялав, оларды миллет маданиятынынъ булаклары ман таныстырув мыратта «Кадеты России», «Казачий курень», «Кавказское подворье» деген киши музейлери де туьзилгенлер. Б.Джемакуловадынъ етекшилеви мен балалар бавынынъ ис коллективи каладынъ миллетлер ямагатлары ман етимисли куллык юритип келеди.
Етимисли ис аьрекети уьшин етекши кыскаяклы Билимлендируьв эм илми министерствосынынъ, ЯНАО Билимлендируьв департаментининъ Сый грамоталарына, солай болып, «Россия Федерациясынынъ ортак билимлендируьвининъ сыйлы куллыкшысы» деген омырав белгисине тийисли этилген.
Ол «Саьбийлердинъ гражданлык, патриотлык эм анъ-эдаплык ягыннан программасын яшавга шыгарган мектебке дейим ийги билимлендируьв ошагы» Россия билимлендируьвининъ элитасы» деген Савлайроссиялык ярысынынъ енъуьвшиси болады. Баска болып, «Миллет азбары» деген байрам программасын уйгынлавда эм озгарувда белсенли катнасканы уьшин Янъы Уренгой кала Администрациясынынъ Разылык хатына да тийисли этилген. Солай болып, ол Савлайроссиялык патриот форумы бойынша «Патриот 2022» миллет баргысы бойынша ярысынынъ эм «Россиядынъ ийги балалар бавы» деген Савлайроссиялык ярысы бойынша «Балалар бавынынъ энъ ийги етекшиси» номинациясынынъ енъуьвшиси болган. Солай ок, «Россия исшилерининъ Сый тактасы деген «Федераллык билдируьв интернет-порталынынъ катнасувшысы. Бопай Амербий кызы 2018-нши йылдан алып «Ногай Эл» ногай миллет-маданият автономиясынынъ агзасы да болады.
Янъы Уренгой каласынынъ Ногай ямагаты Бопай Джемакуловага оьз ердеслерине баьри яктан да демевлик этип келгени уьшин разылыгын билдиреди эм ога берк ден савлык, узак оьмир, Элимиздинъ коьпмиллетли яс несилин тербиялав ис аьрекетинде янъы яратувшылык енъуьвлерин йорайды.
Хаирбек Алакаев.
Суьвретте: Бопай Джемакулова.
Яшавын яс несилди тербиялавга багыслайды
![](https://golosstepi.ru/wp-content/uploads/sites/7/sites/7/2023/06/224aa9ae-468d-4e22-b342-a79faaaf1276-769x1024.jpg)