Конституцияды кабыл этуьв – ол кайсы бир элдинъ де демократиялы патшалыкты туьзуьв йолында этилинген маьнели абыты. Сонынъ уьшин де коьп ерлерде сол куьн байрам куьни эм сонынъ яшавшылары ман кенъ белгиленеди.

Россиядагы сондай республикалардынъ бириси Дагестан, мунда 1994-нши йыл 26-ншы июльде Дагестан Республикасынынъ Конституциясы кабыл этилинген. Байрамнынъ маьнелиги сол, неге десе Асыл Закон элимиз эм республикамыз уьшин енъил болмаган заманларда кабыл этилинген эм регионда тынышлыкты, эмишликти эм коьп миллетли дагестан халкларынынъ бирлигин сакламага амал берген. Соннан 9 йыл оьткен сонъ элимиздинъ ямагат-политикалык яшавында болган туьрленислерге коьре, 2003-нши йылдынъ 10-ншы июлинде республикадынъ янъы Конституциясы алынган. Болса да республика Конституция байрамын биринши Конституция алынган куьннен алып белгилеп келеди.
Дагестан Конституциясы бизим яшавымызда кайдай орынды тутады? Элбетте, бек маьнели орынды, неге десе ол Дагестаннынъ гражданлык эм ыхтыярлар республикасы кебинде туьзилуьвинде баслапкы орынды тутады эм республикадынъ Асыл Законы болып саналады. Конституция негизинде биз гражданлар яшаймыз, окыймыз, ислеймиз, сайлаймыз, эмленемиз эм тыншаямыз, сол ок кепте сога таянып, респуб-лика етекшилери эм баьри власть органлары аьрекетин бардырадылар. Конституция республикадынъ Асыл Законы болып, Россия Федерациясынынъ эсабында Дагестаннынъ республика статусын, онынъ ямагат туьзилисин, патшалык власть эм ерли самоуправление органларынынъ, солай ок аьдем эм гражданиннинъ ыхтыярларын эм эркинликлерин беркитеди.
Республикамыздынъ бас байрамы ман байланыста баьри де дагестанлыларды, сонынъ санындагы ногай халкымызды кутлаймыз. Аьр кимге де ден савлык, уьстинликлер, эмишлик, наьсип йораймыз.