Дослык деген коьп яклы анълам, ол – аьдемлер ара катнаслардынъ айырым бир кеби. Ол – бир-бирисин яратув, сыйлав, анълав, ортак кызыксынувлар, анъ-акыл яктан ювык болув, оьз ара йылы катнаслыгы болган аьдемлер ара байланыс. Дослык, кыймаслык деген аьдемлердинъ коьплеген оьмирлер бойы социаллык, биргелес аьрекетликте туьзилген катнаслык. Дослык деген анъламга социологияда, социаллык политикада, антропологияда эм философияда маьне бериледи. Дослык, сонынъ ишинде кыймаслык та, дуныя юзинде бар, тек оны пайда алувда тувыл, ашык аьлде йылы катнасувлык аьлинде туьзуьв керек.

«Бир кыймасынъ болсын, тек оны дурыс этип сайлап бил», – деген француз язувшысы Мюриель Барбери. Бу яктан мен бек разыман оьз бактыма, ол мени бек ийги кызлар ман, сонъында ярты оьмирликтен артык заман шынты кыймаслар эсабында болган кыскаяклылар ман растырды. Солардынъ бириси – Назира Кельдимуратовна Абдулхамитова (кыз тукымы Койлакаева).
Ызгы бир неше йыллар бойы мен, оьзек те, оны коьрмеймен, ама яшавымызга кенъ кирген янъы технологиялар аркасында бизим куьндегилик байланысымыз бир де уьзилмейди: француз язувшысы айтканлай, «ийги кыймас айтылмаганды да эситип болады».
Белгилев керек, Н.Абдулхамитова кесписи бойынша – окытувшы. Коьп йыллар бойы ол, район еринде окытувшылык аьрекети мен каьрлеп, ногай тилине балаларда суьйимлик тувдырув исине оьз уьлисин коскан. Бу борышты ол, уллы педагог К.Ушинскийге негизленип, оьз куллыгында бас орынга салган. Окувшыларыннан ол оьз ойларын ана тилинде ийги этип айтып бажарувды, ога илми эсабында каравды, сонынъ уьшин онынъ грамматикасын практикада кулланып билуьвди талаплаган.
Тил – ол коьп оьмирлер бойы кепленген халк байлыгы. Оны саклав эм оьрлендируьв исине Назира Абдулхамитова салдарлы косым эткен.
Буьгуьнде Назира кыймасым элимиздинъ сырт каласы Сургутта балалары, уныклары эм йиенлери тоьгерегинде яшав оьмирин бардырады. Айтув керек, ол тетей эм эней эсабында олар акында каьрлевден баска, сол каладынъ оьзиндей тийисли тыншаювга шыккан йолдаслары арасында ямагат яшавынынъ белсен ваькиллерининъ бириси болады, спорттынъ туьрли кеплери мен кызыксынады, спорт ярысларында, Сургут каласында озгарылатаган туьрли маданият шараларында белсенлик пен катнасады. Айтпага, пенсионерлерден туьзилген оьз командасы ман (Н.Абдулхамитова онынъ етекшиси) бирге эки йылдан бери сувда юзуьв ярысында алдышы орынларды бийлейди, а оьзи болса сол ярыстынъ енъуьвшиси де болды.
Кыймасым Назира эсли шагымыз келгенде де сондай яркын яшав ман оьмир суьретаганына, яшав куьезлигин яны ман сезип болатаганына сукланаман. «Дуныяда ялгызлыкты энъ куьшли сезетаган кыскаяклы – ол ювык кыймасы йок хатын», – деген бир белгили язувшы. Эректе турсак та, биз экевимиз ялгызлыкты сезбеймиз.
Л.Эльгайтарова.
Суьвретте: Н.Абдулхамитова.