РФ Президенти Владимир Путин 2007-нши йылдан алып ямагаттынъ эсин кайдай да бир соравга каратар ниет пен, оьзининъ Указы ман аьр кезекли йылды бир тармакка багыслайды. Соьйтип, 2020-ншы йыл Эс эм Данък йылы, озган 2021-нши йыл Илми эм технологиялар йылы болдылар. Янъы 2022-нши йыл болса, Халк саниятынынъ эм Россия халкларынынъ материаллык болмаган маданият асабалыгынынъ йылы деп белгиленди. Мундай карар халк саниятын таралтув, солай ок маданият аьдетлерин, тарих эм маданият эстеликлерин саклар уьшин алынган.
Эл басшысы оькиметке эки ай ишинде уйгынлав комитет туьзбеге, солай ок Халк саниятынынъ эм Россия халкларынынъ материаллык болмаган маданият асабалыгынынъ йылын озгарув бойынша маьнели шаралар планын беркитпеге буйырык берген.
Россия – уьйкен эм коьп миллетли эл. Онынъ еринде 190-нан артык халклар яшайдылар. Аьр бир халк- тынъ оьзининъ маданияты, тили, аьдетлери бар. Соларды саклав бек маьнели.
Халк саниятынынъ эм Россия халкларынынъ материаллык болмаган маданият асабалыгынынъ йылы бойынша регионларда фестивальлер, ярмалыклар, тематикалык выставкалар, лекциялар, мастер-класслар, солай ок яратувшылык коллективлердинъ концертлери озгарылаяклар.
Н.Кожаева.