9-ншы июньде Ногай район администрациясында 7-нши шакырувдынъ Ногай муниципаллык районынынъ Депутатлар йыйынынынъ 50-нши сессиясы болып оьткен.
Сонынъ исинде «Ногайский район» МР Депутатлар йыйынынынъ председатели Джамалутдин Эсиргепов, район парламентининъ дайымлык негизинде депутаты Рустам Байманбетов, район депутатлары, ямагат организацияларынынъ етекшилери, СМИ ваькиллери катнастылар.
Джамалутдин Эсиргепов йыйылганларды сессиядынъ куьн йосыгы ман таныстырган сонъ, районнынъ ямагат организациялар етекшилерининъ тилеклери бойынша Кизляр казак округынынъ Ногай районындагы атаманы Арслан Бекмурзаевке соьзди берди. Ол оьз соьзинде коьшимли малшылык ерлерининъ маьселелери акында айтып озды.
Муннан сонъ депутатлар «Дагестан Республикасынынъ
«Ногайский район» МР бюджетине 2022-нши йылга эм 2023-2024-нши йыллардынъ план кезегине туьрленислер киргистуьв акында» деген
сессиядынъ биринши соравы бойынша район администрациясынынъ финанс боьлигининъ начальниги Арслан Кусегеновтынъ информациясын тынъладылар. Ол район бюджетине Терекли-Мектеб авылында стадион курылысы уьшин 46 миллион 469 мынъ
380 маьнет акша туьскенин билдирди.
Оннан баскалай, тагы да 4 миллион 580 мынъ маьнет «Меним Дагестаным – меним
йолларым» деп аталган республикалык программады яшавга шыгарув эсабында ерли автомобиль йолларын ярастырув эм капиталлык ярастырув ислерине йиберилеек деп белгиледи Арслан Кусегенов.
Онынъ айтувы ман, солай ок янъыларда «Дагнефть» компаниясыннан штраф тоьлевлери эсабында эртеректе билдирилген 17 миллион маьнет акша да район бюджетине туьскен. «Сол шаклы акша
оьлшемине район бюджетининъ келимлер кесегин арттырмага маслагат этемен», – деди ол депутатларга. Кусегенов белгиленген акша карыжы кайдай ислерге шыктажланаягы акында айтты. Сонынъ эсабында район архивининъ меканын ярастырув, оргтехника ман муьлк сатып алув, кокыс тасланатаган контейнерлерди ерлестируьв эм сондай коьп баска ислер аталды. Айтылган сорав бойынша депутатлар бир тавыстан карар кабыл эттилер.
Район Депутатлар йыйынынынъ етекшиси сессиядынъ экинши «2022-нши йылдынъ 19-ншы май айындагы 02-06/08-2022 номерли ДР
Ногай районынынъ прокуратурасынынъ ДР «Ногайский район» МР муниципаллык районынынъ Депутатлар йыйынынынъ Яс-явка парламенти акында положениеди беркитуьви акында карарына каратылган протестин ойласув акында» деген сорав манбайланыста анълатувын этти. Онынъ соьзи мен, район прокуроры алдынгы Яс-явка парламенти акында положение орынына янъысын кабыл
этуьв керек деп билдирген.
Район депутатлары Яс-явка парламенти акында янъы положениединъ проектин хош коьрип кабыл эттилер.
Сессия кутылган сонъ «Шоьл тавысы» республикалык газетасынынъ бас редакторы Эльмира Кожаева аьр бир район депутатын оьз авылларында тувган ногай газетасына язылувды уйгынламага эм керексинетаган пенсионерлерге газетага язылмага ярдам этпеге шакырды.
М.Юнусов.
