Буьгуьнлерде Украина еринде оьтетаган спецоперациясында ортакшылык этетаган ердесимиз – Червленные Буруны авыл яшавшысы Руслан Мусауровтынъ аьелинде 9-ншы Май куьнинде дуныя юзине кишкей саьбий энди. Ата-анады, олардынъ ювыкларын суьйинтип увыл тувды.

Бу суьйинишли оьзгерис пен тамада лейтенант Руслан Мусауровтынъ ян косагын балалар туватаган уьйге «Ногайский район» МР администрация аькимбасынынъ ис борышларын толтырувшы Хамидулла Саитов, район эм Терекли-Мектеб администрациялар ваькиллери кутлав ниет пен келдилер.
Врач-акушер Эльвира Утегенова белгилегенлей, Ислам деп ат тагылган саьбий 4 килограмм шеккили баьтир болып тувган. Баладынъ да, анадынъ аьллери ийги.
Х.Саитов аьскершидинъ аьлейи Барият Мусауровады сондай оьзгерисли куьн мен ак юректен кутлады, савкатлар эм акша тапшырды.
Дуныя юзине янъы энген кишкей саьбийдинъ анасы оьз аьели атыннан Х.Саитовка эм сол куьн онынъ суьйинишин боьлискен баьрисине де оьз разылыгын билдирди эм тоьбемизде дайым да таза коьк болганын йорады.
Белгилеп озайык, тамада лейтенант Руслан Мусауров Украина еринде оьтетаган спецоперациясынынъ биринши куьниннен алып сонда ортакшылык этеди.