Буьгуьнлерде кайбиримиз де бир тилек тилеймиз – тынышлык келсин дуныяга, Аталыкты коршалавшыларымыз аман-эсен оларды куьтип турган аьеллерине кайтып келсинлер. Сондай ак ниети мен согыс спецоперациясында явга карсы турган йигитлеримизге кайдай уьйкен ярдам Ставрополь крайынынъ Нефтекумск районынынъ Коясыл авылында неше йылдан бери аьрекетлейтаган «Бирлик – Единство» волонтерлар куьби этип турады. Янъыларда волонтерлар куьбинде конакта сыйлы аьдемлер болдылар – Ставрополь крайынынъ НРНКА исполкомынынъ председатели Артур Гульмедин увылы Ибрагимов, Нефтекумск муниципаллык округынынъ депутаты, ерли ННКА председатели Салих Касамбий увылы Бекмуратов, Коясыл авылыннан СВО катнасувшыларынынъ бириси. Йолыгыс коьтеринъки коьнъилде оьтти, йылувлык аьлде йыйылганлар этилинип турган ислери, йигитлеримизге келеекте кайдай коьмек этуьв акында соьйледилер. Йолыгыс барысында волонтерларга «СВО-да волонтерлар. Бирлик – Единство» Коясыл авылы» шайытламалар (удостоверениелер) тапшырылды. Бу тек документ болып калмай, волонтерлардынъ бирлигининъ, олар эткен ислерди аянлавдынъ эм келеекте де бу исти бардырувдынъ белгиси деп саналады. Солай ок волонтерларга СВО катнасувшыларга ярдамга коскан уьлиси уьшин Ставрополь крайынынъ Ногай региональли НКА исполкомынынъ председатели атыннан Разылык савгаланды. «Бирлик – Единство» волонтерлар куьбининъ катнасувшылары сыйлы конакларга савбол айттылар, бу йолыгыстынъ маьнеси уьйкен экенин белгиледилер. Айырым разылык авылшыларга эм яны авырыйтайган ердеслерге билдирилди. – Сизинъ акшалай коьтергишлевинъиз, йылы соьзинъиз бизге ислемеге куьш бередилер. Сизинъ арканъыз бан биз саваплы исимизди бардырамыз, йигитлеримизге коьмек этемиз, – деп савбол айттылар волонтерлар. Ясларымыз уьшин халкымыздынъ яны авырыса, енъуьв келер тез арада. Явды енъермиз, неге десе бизим ниетимиз таза. 

Г.Бекмуратова. Суьвретте: йолыгыстан коьринис.