Уьстимиздеги йылдынъ казан айынынъ баслапкы куьнлериннен алып тек туьнегуьнлерине дейим де он бес ясына толмаган дагестанлы окувшылар «Кожаный мяч – Школьная футбольная лига» савлайроссиялык базласында медальлер уьшин куьрестилер.
Базлас Анапа каласында ерлескен «Смена» ВДЦ- да болып озды. Бу йылгы турнир айтылган совет футболисти эм тренери Никита Симоняннынъ эстелигине багысланган эди эм сол шара элимиздинъ баьри регионларыннан да окувшыларды йыйды, баьриси 800 футбол ойынын ойнайтаган окувшылар эдилер.

 Республикамызды сол айтылган турнирде уьш куьп ваькилледи: Ахвах районынынъ Каратинский гимназиясыннан эм Ногай районынынъ Терекли-Мектеб авылыннан – кеде балалар, Карагас авыл орта мектебиннен– кызлар куьби.

Бир неше куьн узагында оьткен футбол турнири окувшылар уьшин бек кызыклы эди. Олар ойын сулыбын оьстируьвден баска болып, туьрли мастер-классларга да шайыт болып, оьзлери де катнастылар.
Савлайроссиялык финалга дагестанлы окувшылар оьзлерининъ йигерлиги мен йолламага (путевка) тийисли болдылар.

Йогарыда белгиленген уьш куьп ойнавшылары да, баьриси 323 мынъ окувшы катнаскан, Дагестан мектеб футбол лигасында савгалы орынларга тийисли болган эдилер. Сол ойында Каратинская гимназия окувшылары кеделер куьп сырасында– биринши орынга эм Карагас авыл орта мектебиннен кызлар куьби сырасында (тренери Адильхан Менласанов) биринши орынга тийисли болган эдилер, а Терекли-Мектеб авылынынъ мектеб окувшылары (тренери Алан Ярикбаев) экинши орынга тийисли болып, толтырма квота бойынша савлайроссиялык ойында катнасувга

ыхтыяр алган эдилер. Турнир бойынша дагестанлы окувшылар бек кызыклы ойынды коьрсеттилер, Ахвах районынынъ Каратинский гимназиясынынъ окувшылары оьзлерининъ ийги эм куватлы деген атын яклады, олар – биринши орында. Бу куьн – кишкей Ногай районымыздынъ шоьллигинде тувып-оьскен балалары да энъ де ийгилер сырасында, савлайроссиялык «Кожаный мяч – Школьная футбольная лига» базласында Карагас авыл орта мектебининъ кызлар куьби – алтыншы орынды, Терекли-Мектеб авыл мектебининъ кеделер куьби етинши сырады бийлеп кайттылар.
Сол тувыл ма етимис деген?! Ак юрегимизден сондай дережели орынга етискенлерди кутлаймыз, алдыда савгалы орында болаягынъызга бек сенемиз.
Ийги ойынды коьрсеткен окувшыларды Ногай районымызда бек йылы йолыктылар, Терекли-Мектеб авыл
аькимбасы Марат Избулла увылы Кулунчаков ногайымыздынъ ийги атын, кишкей аталыгымызды Россия
кезегинде таныткан окувшыларга тийисли йолыгысты уйгынлады.
Ногай районымыздынъ
Савлайроссиялык базласында ортакшылык эткен куьп тренери Алан Ярикбаев пен толы хабарласувды газетамыздынъ кезекли номеринде бермеге ниетленемиз.
Г.Сагиндикова.
Суьвретлерде: Ногай районымыздан «Кожаный мяч – Школьная футбольная лига» савлайроссиялык турнир кат-
насувшылары.