Батыр-Мурза авылында маьнели социаллык объектлерге баратаган асфальт йолы тоьселген. Соны ман байланыста авыл еринде шатлыклы шара озгарылды. Ерли яшавшылар уьшин бу оьзгерис шынты байрам эсабында болды: энди мектебке, медициналык учреждениеге эм авылдынъ баска керекли объектлерине баратаган йол онъайлы эм кавыфсыз болды. Авыл йолына асфальт тоьселди Дагестан Республикасынынъ «Меним Дагестаным – меним йолларым» приоритетли проектине коьре. Соны ман уьйкен оьлшемли куллыклар яшавга шыгарылды: Красноармейская (узынлыгы – 370 м) эм Красная (узынлыгы – 250 м) орамларына ийги ремонтлав ислери этилген: айтпага, 2460 кв. метрден артык ортак майданлы ердинъ янъы материал косув ман гравий тоьселген табанынынъ профили туьзетилген, 2460 кв. метрден артык ортак майданлы ерге калынлыгы 4 см болган асфальт-бетон тоьселип салынган, йол кавыфсызлыгын арттырув уьшин йолдынъ туьз тувыл ерлери искусстволык аьлде яракланган. Авыл уьшин бу этилген куллыклар – инфраструктурадынъ оьрленуьвинде алдыга маьнели абыт: йол тек туьз тувыл, аьлиги заманга келисли эм кавыфсыз болды. Бу оьзгерисли байрам шарасында коьп сыйлы конаклар йыйылдылар: Ногай район етекшиси Джамалутдин Эсиргепов, район Депутатлар Йыйынынынъ председатели Алибек Менласанов, район билимлендируьв боьлигининъ начальниги Амирхан Межитов, ДР Ямагат палатасынынъ агзасы эм район Профсоюз комитетининъ председатели Арслан Бакиев, «сельсовет Коктюбинский» СП МО аькимбасы Замир Суюндиков, район Ямагат палатасынынъ председатели Эльмурза Саитов, «Ногайское РСУ» АО филиалынынъ директоры Джамбулат Караев, «Единая Россия» партиядан ДР Халк Йыйынына депутатка кандидат Алибек Мурзаев, «Яслык» яс-явка орталыгынынъ начальниги Абибулла Шамбилов. Олар ман бирге шарада авыл яшавшылары, Ш.Менлигазиев атындагы БатырМурза авыл мектебининъ окытувшылары эм окувшылары ортакшыладылар. Йолыктылар конакларды ийги аьдет бойынша миллет асы – катлама ман. Айырым йылувлык костылар байрамга балалар: олар ийги концерт программасын аьзирледилер эм оьз оьнерлери мен баьрин де суьйинттилер.