Россияда 3-нши сентябрьде Терроризм мен куьресте макулласув куьни белгиленеди. Бу эстеликли куьн 2004- нши йылдынъ 1-3 сентябринде Беслан каласында болып оьткен кайгылы оьзгерислерге багысланган, сол заман савлай дуныя элимиздинъ янъы тарихинде аьдем коьрмес кайгыдынъ шайыты болды. Сол куьнлерде аьр биревдинъ юреги сызлап, аманатка алынганлардынъ бактысы калай болар экен деп, билдируьвлерди тергеп турды. Аьли болса савлай элимиз, республикамыз, сонынъ сырасында Ногай районымызда да, янлары курман болганлардынъ эстелигине багысланган шаралар оьтедилер. Терроризм мен куьресте макулласув куьнинде А-Х.Джанибеков атындагы мектебинде эстеликли шара уйгынланды. Аьдет бойынша, линейка Россия эм Дагестан гимнлери мен басланды. Шарада конакта болган согыс оьзгерислер ветераны, «Шоьл тавысы» республикалык газетасынынъ бас редакторы Эльмира Кожаева биринши болып окувшыларга каратылган соьзлерин айтты. – Сол кайгылы оьзгерислерден йырма йылдан артык заман оьтти, биз аьлиге дейим юреклеримиз шаншып сонынъ акында айтамыз, бу кайгыды – яшавлары тек басланып уьзилген куьнаьсиз балаларды эм оларды куткарар уьшин оьз янларын аямаганларды мутып болмаймыз. Заман яраларды эмлейди деп айтылады, тек сога Бесланда болган теракт бойсынмайды. Бу куьнлерде Россия Президенти Владимир Путин сол кайгылы оьзгерислер – балаларга каратылган терактлар кайтып болмасын деп баьри куьшин салады. 2022-нши йыл нацистлерге, террористлерге карсы согыс спецоперация басланды. Ол бу куьнлерге дейим барады. Нацизм мен куьрескенлер сырасында бизим ердеслер де бар. Ногай районынынъ 300-ден артык яшавшысы согыс озган ерлерде алдышылыкта явды согадылар, – деди Эльмира Юнусовна. Ол балаларды бизим аьскершилерди коьтергишлемеге: оларга йылы хатлар язбага, ясырынатаган шилтерлер сокпага шакырды. Мектеб етекшиси Курасхан Ярикбаева 22 йыл арттагы кырк кийик айынынъ 1-3 куьнлериндеги йойымлар акында йыйылганлардынъ эсине салды. Террористлер колыннан 333 аьдемлер яшавы уьзилген, солардынъ 186-сы – балалар. Байрам куьн караклар балалардан дайымларга 1-нши сентябрьдинъ суьйинишин тартып алдылар. Бу ян авырув аьдемлердинъ юреклеринде аьлиге дейим яшайды. Линейкада юнармеецлер баьтир ердеслеримиздинъ йигитликлери акында айттылар. Олардынъ колларындагы суьвретлерде биз террористлердинъ коьзлерине йигерли караган йигитлерди коьремиз, тек олар бизим арамызда аьли йок. Календарьде кайгылы куьнлер, озган заман ман яшар уьшин тувыл, олардан тарихтинъ ашшы дерислерин алар уьшин эм кайгы тагы кайтарылмасын деп, токтастырылган. Шарадынъ сонъында 10-ншы класс окувшысы Камила Кургановадынъ аьр биревдинъ ян сезимлерин козгап окыган ятлавы йыйылганларды сентябрьдинъ кайгылы куьнлерине коьширди. 

Нурият Кожаева.