Бар сондай инсанлар, намыстынъ законлары бойынша яшайдылар. Олар бизим арамызда, биринши караска, биревден де баскаланмайдылар, ама сынавлар туьссе, енъилмейдилер, Аталыгынынъ кызыксынувларын оьзлериндикиннен йогарыга саладылар. Сондай аьдемлер – баьтирлер, кимнинъ атлары заманга бойсынмайдылар. Уллы баьтирликти коьрсетти он йылдынъ артында, 2016-ншы йылдынъ шилле айынынъ 10-ншы куьнинде полиция лейтенанты, бийик Сергокала авылында тувып-оьскен йигитимиз Магомед Нурбагандов. Аьжелдинъ алдында, явдынъ савытсадагыннан коркпай, ол Россиядынъ баьтирлик йылязбасына кирген соьзлерди айтты: «Исленъиз, йолдаслар». Бу соьзлер тек полиция куллыкшыларына тувыл, баьримизге де
шакырув болады. Дайымларга олар берк эркликтинъ уьлгиси эм Аталыгымыз алдында алаллыктынъ белгиси болып калган.
Магомед Нурбагандов Дагестан Республикасынынъ даргин Сергокала авылында тувыпоьскен, онынъ ата-бабалары
асылы ман Урахи авылыннан болган. Оьз авылындагы экинши номерли лицейди тек йогары белгилерге битирип, Магомед Дагестан Республикасынынъ патшалык университетине туьседи эм юридический боьликти уьстинликли кутарады. Ис аьрекетин Магомед Каспийск каласында вневедомстволык боьлигинде баслайды. Сол йылларда аьел курып, ян йолдасы ман эки аьвлетин
оьстиреди.
Сол каарлы куьн Магомед Нурбагандов оьзининъ кардашы ман Сергокаладан коьп узак тувыл ерде караклар ман оьлтирилген. Террористлер Магомедтинъ ис удостоверениесин коьрип, онынъ полицейский экенин биледилер. Оьлтиреектен алдын олар Магомедке ис йолдасларына камерага карап, берген антын бузып, правосаклав органларыннан тайынъыз деп айтканын талаплайдылар.
Болса да, оьлимнинъ коьзлерине карап, Аталыгына эм берген антына алал бизим ердесимиз, полиция лейтенанты Магомед
Нурбагандов басын тоьмен салмайды, ол: «Исленъиз, йолдаслар» деп айтады. Соьйтип, яс полицейский терроризмге турувдынъ белгиси болады. Магомед Нурбагандовты атканын террористлер телефонга язганлар, сол видео бир неше айдан сонъ спецоперация барысында оьлтирилген карактынъ телефонында табылган. 2016-ншы йылдынъ кырк кийик айында Россия Президенти Владимир Путин Россия Баьтири атын дагестан полиция куллыкшысына оьлгеннен сонъ берген. Ол сол баргыды Магомед Нурбагандовтынъ атаанасына тапшырган.
– Магомед – шынты баьтир.
Ол оьзининъ антына эм халкына оьлимнинъ алдында да алал болып калган, – деп белгилеген Россия Президенти.
Янъыларда Петербург каласында халклар ара экономикалык форумында элимиздинъ басшысы Владимир Путин согыс спецоперациясынынъ катнасувшыларына каратылган соьйлевин белгили дагестан полиция лейтенантынынъ соьзлери мен тамамлады. Бу соьзлер украин етекшиси Владимир Зеленскийдинъ ашык хатына явап болды.
– Баьри халк сизге карайды, элимиз сизи мен оьктемсийди, сенеди сизге. Исленъиз, йолдаслар! – деди Путин, аьскершилерге, матросларга эм генералларга карап.
Биз эсимизде саклаймыз Магомед Нурбагандовты. Сол ашшы хабарды эситкеним де аьли де эсимде. Баьтирдинъ тувган авылында езден ясалган эстелик туры, онынъ аты ман республикамыздынъ калаларында, авылларында орамлар, мектеблер аталган. 2023-нши йылда Махачкала каласында Дагестаннынъ данъклы увылына, Россия Баьтири Магомед Нурбагандовка эстелик салынган. Баьримизге де ол – терроризм мен куьресуьвдинъ, йигитликтинъ белгиси.
«Исленъиз, йолдаслар» деген соьзлер баьри ерлерде де айтыладылар, олар тек республикамыздынъ тувыл, савлай элимиздинъ полицейскийлерининъ аьрекетининъ маьнели кесеги боладылар. Эм буьгуьнлерде, элимиздинъ кыйынлы заманларында, бизим коршалавшылар СВО еринде сол соьзлер мен явга карсы шыгадылар эм енъедилер. Сол соьзлерди согыс коьликлерине язадылар.
Биз терроризмге карсы турамыз. Бизи мен бирге биринши сырада Россия Баьтири, уллы Россиядынъ увылы Магомед Нурбагандов турады. Ол оьлимсизликке йогары салынган басы ман абытлады, намысын йойытпады, шынты баьтирге аьжел коркынышлы тувыл экенин ыспатлады.
Россия Баьтирлери. Кайдай йигерли эм кайдай танъ. Куьшли эм ийги. Олар бизге дайымларга ювык болып калганлар. Кыйынлы заманларда, дурыс карар алмага керек болса, биз оларга ойларымызды каратамыз. Олар оьз яшавы ман, оьз баьтирлиги мен бизге дурыс сайлав этпеге амал бередилер.
Биз, ислеймиз, Магомед! Уллы Россиядынъ эм тувган Дагестаннынъ онъайлыгына.
Г.Бекмуратова, Россия Язувшылар агзасы.
Суьвретте: М.Нурбагандовтынъ эстелиги
