Билимлер куьни – ол биринши занъ, юреклер телезуьви, кутлавлар, сенимлер, ярасык гуьл байламлар.
Янъы окув йылынынъ басланувына багысланган шатлыклы линейкалар Ногай районынынъ баьри мектеблеринде оздылар. Кадрия атындагы мектебинде биринши занъ байрамы Россия байрагынынъ коьтерилуьви мен ашылды. Оны коьтермеге сыйлы ыхтыяр 11-нши класс окувшылары Амирлан Толемишов пан Саида Хазбулатовага берилди. Районымыздынъ келеектегиси, бу куьнги шатлык иелери – биринши класс окувшылары оьз окытувшылары Альмира Базаралиевна Махмудова эм Эльвира Крымхановна Акманбетова ман ортага шакырылдылар. Олар ятлавлар яттан айтып, билимлер дуныясындагы биринши куьннен алып шалысувын коьрсеттилер.
Йыйылганларга мектеб етекшисининъ исин кесек заманга юритуьвши Зульфия Кидирниязова саламлав эм кутлав соьзин айтты. Мектебтинъ сыйлы конагы Ногай район Билимлендируьв боьлигининъ етекшиси Амирхан Межитов, район мектеблерининъ уьстинликлерин белгилеп, бу йыл баьриси 31 окувшы 1-нши эм 2-нши дережели медальлер мен савгаланганларын айтып озды. Амирхан Зейнадиновичтинъ соьзлери мен, олар сондай етимислерге районымыздынъ баьри окытувшыларынынъ иси аркалы етискенлер. Тагы да ол оькимет сынавларында эки сабактан 95-тен артык бал алган окувшылар сырасында бу мектебте окыган Милана Абдулмусаурова бар экенин оьктемлик пен айтты. Кызалакка Дагестан Оькиметиннен 100 мынъ маьнет акша да тапшырылган.
Окув йылынынъ басланувы ман йыйылганларды РФ эм ДР ат казанган маданият куллыкшысы, белгили ногай композиторы Яхья Кудайбердиев кутлады.
Мине доьрт йылдан бери согыс спецоперациясы барады, эм Биринши занъ байрамын биз ердеслеримиз СВО барысында йигитликлер коьрсетуьви мен бирге белгилеймиз. Янъыларда бу мектебте куллык эткен Аджинияз Акимов каты урыслар озган мезгилде баьтирше янын берген. Онынъ эм баьри йигитлер эстелигине йыйылганлар бир такыйка уьндемей токтадылар. Эли уьшин янын берген Аджинияз Акимовтынъ хатыны, бу мектебтинъ етекшиси, ДР ат казанган окытувшысы Альфия Акимовадынъ атыннан биринши класс окувшыларына тек «бес» белгилерге окыйтаган окувшылар Рашид Акимов эм Фатима Алыпкашева савкатлар тапшырдылар.
Биринши занъды 11-нши класс окувшылары Темирбек Межитов, Наима Агаспарова эм биринши кере мектебке келген Ева Зиряева, Али Эсмухамбетов, Нурсултан Кудайбердиев, Айнара Сагиндикова бердилер.
Нурият Кожаева.
Суьвретте: шатлыклы линейкадан.