Тогызыншы классты окып тамамлав – окувшылар яшавында маьнели шак, ол мектебте окувдынъ биринши кезеги таьвесилуьвин эм келеектеги йолды сайлав ман байланыслы янъы шак басланувын белгилейди.
Тамбыз айынынъ ызгы куьнинде А-Х.Джанибеков атындагы мектебинде эсте сакланган яркын оьзгерис болды. Мунда 9-ншы
классты окып тамамлаган эм сынавларды уьстинликли оьткен окувшыларга шатлыклы аьлде аттестатлар тапшырылды. Кешлик юритуьвши окувшылар Алим Карагулов эм Джарият Исмаилова мектебтинъ актовый залына окувшыларды шакырдылар. Бу йыл тогызыншы классты окып тамамлаган 100 окувшылар янъы мыратлар эм уьйкен сенимге толган йолына абыт аладылар. Коьзлери суьйинишке толган ярасык шатлык иелерине каратылган йылы йоравларын биринши болып мектеб етекшиси Курасхан Джумагельдиевна Ярикбаева айтты. Ол окувшылар тек билим алып калмай, досласып, бир-бирин коьтергишлеп, кыйынлыкларды оьтип эм уьстинликлерге суьйинип уьйренгенин айтты. Мектеб етекшиси окувшыларга оьз алдына йогары мыратлар салып, оларга етисуьв уьстинде ислемеге, оьзлерине сенмеге шакырды. Мине окувшыларга аттестатлар тапшырув мезгили де етти, баслап окувында уьстинликлерге етискен, тек «5» белгилерге тогыз классты тамамлаган окувшылар
яшавындагы биринши шайытламасын алдылар. Олар – Ислам Манкаев, Эльвина Эрежепова, Айгуль Картакаева, Милана Аджикова эм Эмиль Юнусов. Бу окувшыларга мектеб етекшиси оьз сукланувын эм суьйинишин ясыралмай баьри куьшин
салып билимге шалысканы уьшин, ак юректен разылыгын билдирди.
Солай болып бу куьн биринши занънан алып сынавларга дейим узын йол оьткен окувшыларга ак юректен оьз маслагатларын
мектеб етекшисининъ орынбаслары Хадижат Казгереевна Аракчиева эм Эльмира Танъатаровна Суюндикова айттылар. Класс етекшилер атыннан Сабина Маулиталиевна Толубаева шыгып соьйледи. Бу кешлик тек аттестатлар тапшырылган
шара болып калмай, келеектеги мен йолыгысув байрамы болды. Алдыда ашык йоллар!
Уьйкен сый ман халкымыздынъ айтылган аьдемлери шыккан А-Х.Джанибеков атындагы мектебинде билим алганлар окувшылар деген атты юритинъиз.
Нурият Кожаева.
Суьвретте: 9-ншы классты кызыл аттестатка кутарган окувшылар.
