Алибий Куьбий увылы Романов. Ким оны танымайды, ким онынъ йырлавында ногайымнынъ бурынгы йырларын, шалган домбыра сазларын эситпеген… Акын, шынтысы ман да халкымнынъ талаплы инсанларынынъ бириси эм тириси эди… Оькинишке, эди. Йок, ол оьлмеген, шалынады кулагыма онынъ
таза шыктай тавысы, сарнайды колында кобызы ман  домбырасы…
Аьдетинше арамыздан кеткен белгили аьдемлерге багысланган эстелик шаралар, кешликлер бир кепли болып оьтетаган эди, бу куьн сол кеп бузылып, бир
аьлемет шара болып оьтти деп айтпага да боламан. Олай дегеним, йок эди бу куьн элди бездирген соьзлер, арамыздан кеткен талаплы аьдемимиздинъ
бактысы, яратувшылык йолы акында да официаллы соьйлевлер… Бу куьн концерт программасын карамага келген аьр бир инсан бактыга савбол айтып, сондай инсан халкымызда болганына оьз разылыгын билдиргенине шекленмеймен.
Ногай халкынынъ савгасы эди Алибий Романов деп йигерли кепте айтаман. Ногайымнынъ Акыны, уьйкен юрекли баалы инсаны…
Кешлик басланаятырганда ок, сонынъ биринши такыйкасыннан алып, ийги аьлде оьтееги белгили эди.
Халк яратувшылык уьйининъ капысына абытынъды алганлай ок йылы аьл, таза коьнъил…
Кешликти болдырган аьдемлердинъ бириси – Дагестан Республикасынынъ ат казанган маданият куллыкшысы, бу проекттинъ авторы, режиссерлык
исин толтырувшы Сабират Казгерей кызы Абубекерова йыйылганлар алдына шыгып, программадынъ озув кебин анълатты.
Сахнада – «Айланай» фольклор-этнографиялык патшалык ансамблининъ етекшиси Мурат Умар увылы Ваисов Алибий акында поэтикалык шыгармады яттан окувы ман. Сонда Алибийдинъ савлай бактысы суьвретленген эди.
Ятлавды Мурат терен сезим мен, яваплылык пан окыды: коьз алдында уныкларга, немерелерге асабалыкка калаяк тарих тувды… Алибий. Ол бизим халкымызга берилген уьйкен савга. Онынъ сондай талабы болувында атасы ман анасынынъ да уьйкен уьлиси бар. Йыравдынъ анасы бек уьста домбыра ойнавшы эм шынълавшы эди. Оны мен оьзим де Алибийдинъ бир мерекели кешлигинде коьргенмен эм эситкенмен. Атасын таныганлар – «Ол да баьтир йырлардынъ устасы болган»
дейдилер…
Солай болганда, сондай тамыр, кан аркалы яшавга энген аьдем баска болып та тувмага да керек тувыл эди. Ногай халкынынъ Акыны. Бу сыйлы ат ога босына
берилмеге. Алибий Романов оьзининъ миллетин шынтылайы ман да ак юрегиннен суьйген, бурынгы йырларды усташа аьлемет   ярасык давысы ман йырлап
болатаган инсан эди. Керек тувыл эди ога янъы технологиялар аркалы косылатаган тавыс ийгилендируьв, бир затлар косув, аьр кайсы заманда да ол табиат
пан усындырылган оьнери мен шыгып, кайсы ерде де уьйкен аудиториялы каравшыларды йыйып болатаган эди. Эсимде онынъ йырлаганы эм йырлары… Соьйтип неше аьдем де айтаягына шек йок.
Бу куьнги проект сахнага йыравдынъ окувшыларын эм онынъ шынты досларын йыйды. Программа оьз алдына бек кызыклы да эди. Мунда, бу куьн коьрсетилген биювлер де назарды каратты. Сол ярасык биювлердинъ болувына уьйкен куьшти хореографлар: Альмира Тунгатарова, Эльмира Суюндикова, Альфия Аджибатырова салганлар.
Ногай эстрадасынынъи артистлери: Фатима Нурлубаева, Мурат Ваисов, Артур Межитов, Залимхан Колебаев, Медина Елманбетова, Алтынай Ярикбаева Алибий Романовтынъ йырлавында халк арасында белгили болган, ол анъ салган йырларды усташа йырлап эситтирдилер.
Бу куьн Алибий, халкымнынъ шынты увылы, оьнерлилердинъ оьнерлиси, янымызда болгандай эди…
Концерт программасынынъ ызында оьз эскеруьвлери мен Алибийдинъ яратувшылыгы акында Ногай район аькимбасы Джамалутдин Эсиргепов, Нарбике Муталлапова, Эльмира Кожаева, Даниял Исакаев, онынъ ювыклары Райхан Шангереева, хатыны – Альфира, карындасы Гульбария боьлистилер.
Аьр кайсысы да бу куьнги шара толысынша сапатлы эм салдарлы болганын белгиледи…
Г.Сагиндикова.
Суьвретте: Алибий Романовтынъ эстелигине багысланган концерт программасыннан сонъ.