Ногай районымыздынъ Орта-Тоьбе мавылында бу куьн шынтысы ман да балалар байрамы эди: мектеб азбарында занъыраган анъ сеси, бизим келеектегимиз – саьбийлер уьшин уйгынланган шаралар бек каьмбил туратаган кеделер мен кызлардынъ сейирин келтирмей болмады.
Буьгуьн авыл уьй куслар сеслериннен тувыл, завклы анънынъ шалынувыннан уянды деп айтпага да болады…
Балаларды коршалав Халклар ара куьнин Орта-Тоьбе авылында бек уйгынлы эм кызыклы озгардылар.
Кишкей саьбийлерди баслап мектебте йылы йолыктылар, оннан сонъ олар уьшин байрам маданият уьйининъ азбарында бардырылды. Мектебте олар уьшин байрам уьйле асы асылды эм берилди. Сол куьн аьр бир саьбий оьзин бир аьлемет дуныясына туьсип, бир маьнели эртегидинъ келбети этип сезбесе де болмас эди.
Балалар – бизим келеектегимиз.
Олар уьшин аьлиги заманларда коьп ийги аьллер, яшав шартлары туьзиледилер, аьвлигуьв ойынлар да аз тувыл…
Уйкылы-уяв болган балаларды мектеб азбарына киргенлей ок окув ошагынынъ етекшисининъ маслагатшысы Назира Николаевна Сагиндикова толы коьнъили мен йолыкты эм аьр бир балага оьзининъ йылы куьлемсиревин савгалап, ийги йоравларын да айтты.
– Буьгуьн бизде айлак ийги куьн: анъ, йылы йоравлар эм кутлавлар, туьрли зыяпетлер де бердилер, ама кызыклысы алдыда деп сеним эттиредилер,
– дейди авылдынъ кишкей яшавшысы.
Балалар мектеб майданыннан маданият уьйине келгенде, мунда да олардынъ сейири калмай болмады: туьрли ойынлар, биювлер эм таьтли азыклар…
Авыл администрациясынынъ куллыкшылары да оьз уьлислерин косканлар – балалардынъ кавыфсызлыгын тутувдан басланды байрам.
Мунда шарады бу окув йылды ийги белгилерге окып кутарган аьптелисинълили Хадиджа эм Милана Кокенеевлер кызыклы эм кызувлы юриттилер. Олар маданият уьйининъ куллыкшылары ман бирге туьрли базласувлар оьткердилер, кыскаша айтканда. Бу куьн балалар уьшин бек ийги байрам уйгынланган эди.
Бу куьн «сюрприз» дегени шарадынъ ызында эди. Балаларды суьйиндиргени – «мыльные пузыри» шоу. Авада ушкан сабынлы коьпиршиклердинъ оьлшеми аьр бир балады суьйиндирди эм сейирсиндирди.
Сондай сыхырлы аьлде битти байрам шарасы, алдыда болса, язгы яй алув шагы. Аьр бир балага сол шак кызыклы эм наьсипли болсын…
Галима Сагиндикова.