Ян тоьрин козгаган эм сол ок заман шатлыклы шара озгарылды янъыларда Ногай район администрациясында: СВО катнасувшысы, Карагас авыл яшавшысы Фарид Джумагишиевтинъ ювыкларына «Орден Мужества» эм «За отвагу» медали тапшырылды. Савгалар онынъ ювыкларына баьтир ердесимиз оьлгеннен сонъ берилген, тувган ерининъ кызыксынувларын коршалавда коьрсеткен йигитлигин йогары баалап.
«Орден мужества» эм «За отвагу» медали баьтирдинъ анасына эм ян косагына тапшырув шарасында Ногай район аькимбасы Джамалутдин Эсиргепов, Ногай эм Тарумов районларынынъ военкомы Ваха Хадизов эм район Депутатлар йыйынынынъ председатели Алибек Менласанов ортакшылык эттилер.
Йыйылганлар алдында шыгып соьйлеп, район аькимбасы Аталыгымызды коршалавшылар аьеллерин колтыклавдынъ айырым маьнелигин белгиледи. Ол СВО катнасувшылар аьеллери алдында турган баьри соравларды администрация тезлик пен шешпеге шалысатаганын белгиледи, эм оьзи де кайдай яшав аьеллерде де колтыклавга аьзир экенин де сендирди.
Шарада Фаридтинъ аьелине каратылып юректен алынган коьп йылы соьзлер айтылды. Йыйылганлар эр йигитти ювыкларына эм анасына каты кайгырувларын, солай ок сондай шынты патриотты эм баьтирди тербиялаганы уьшин разылыкларын билдирдилер.
Фаридтинъ эки кишкей кызлары калдылар – оларды эм савлай аьелди аьли колтыклавдынъ боьтен де маьнелиги бар.
Савгалар тапшырув шарасынынъ катнасувшылар сырасында район администрация ислери мен басшылавшыдынъ куллыгын юритуьвши Зухра Аджиманбетова эм «Яслык» яс-явка орталыгынынъ етекшиси Абибулла Шамбилов бар эдилер.
Фарид Джумагишиевтинъ баьтирлиги – ол тек район йыл язбасы тарихинде тувыл, оьз ердеслери эсинде эрликтинъ, йигитликтинъ коьрими болып сакланады.
Район администрациясынынъ пресс-службасы.