Россиядынъ Предпринимательлер байрамы йыл сайын курал айынынъ 26-ншы куьнинде белгиленеди.
Сондай етимисли предпринимательлердинъ бириси болады Байманбетова Насипхан Зекерьяевна. Ол коьп йыллардан бери сол ис аьрекети мен каьрлеп, сулыбын оьстирип, оьз
халкын керекли курылыс алатлары ман канагатлавда уьлисин косып келеди.
Насипхан Зекерьяевна 1960-ншы йылдынъ увыт айынынъ 10-ншы куьнинде ЧервленныеБуруны авылында Данъклы Ис орденининъ толы кавалери, ветсанитар, атаклы койшы, йибек юнли йыныслы койларын алдышы асыллавшысы, ДАССР-нынъ ат казанган мал саклавшысы деген сыйлы атынынъ иеси Зекерья Кошерович эм онынъ конаксуьер эм
куллыксуьер ян косагы Асиет Адиль кызы Шомаровлардынъ татым аьелинде тувган. Белки куллыксуьер аьдемлердинъ колында тербияланганга болар, кыскаяклыда оьз исине яваплылык, оны куллыгын юреги мен суьюви, кайсы баслаган исин де сахый толтырув эм сонъына дейим еткеруьв сапатлары бала шагыннан шыныгып, беркип келип, ойлаган мырадларына етиспеге ярдамын эткени де. Насипхан Зекерьяевна 1978-нши йыл ерли мектебти тамамлаган сонъ, Харьков каласындагы авыл-хозяйстволык институтынынъ экономикалык факультетине туьседи эм оны 1983-нши йылда тамамлайды. Сол окув ошагында экономист бухгалтер кесписин байырлаган кыздынъ алдында кызыклы туьрли йоллар ашылып, оьзине тарттылар.
Ис аьрекетин кыскаяклы Ленин атындагы совхозында бухгалтер аьрекетиннен баслады. Заман оьтип, ога Харьков, Тульский областьлеринде, 1991-1997-нши йылларда Дагестаннынъ Ногай районындагы сбербанк филиалында, оннан сонъ, Ногай районынынъ 29-ншы номерли ДЭП боьлигинде бас экономист, бухгалтер болып ис сулыбын байытып келмеге бакты буйырды. Сол ислеген ис йолдаслары акында ол буьгуьнлерде де йылы атанады. Предпринимательлик ис аьрекетин Насипхан Зекерьяевна оьз ян косагы Арслан Алимханович пен (яткан ери ярык болсын) коьп йыллар артта баслаганлар. Арслан Алимханович Ногай районында коьп йыллар бойы сол пайдалы исин каьрлеви мен район яшавшыларын курылыс алатлары ман канагатлап келди. Онынъ Терекли-Мектеб авыл администрация аькимбасы эсабында авыл яшавын онъайландырув, коьрклендируьв мырадта коьп куллыкларын эткени яшавшылардынъ буьгуьнлерде де эсинде. Атадан коьрген ок атар, анадан коьрген тон пишер, дегенлей, буьгуьнлерде атасынынъ йолын ызлап, сол аьел предпринимательлик исине олардынъ увылы Тимур Арсланович те оьз уьлисин косып келеди. Ол бала шактан атасы эм анасы баслаган аьел исине кирисип, предпринимательлик аьрекетининъ коьп усталыкларына уьйренди, сулыбын байытты. Ол Махачкалада политехникалык институтын тамамлаган сонъ, аьел бизнесин
коьтеруьвде сав куьш-куватын аямайды. Буьгуьнлерде яс бизнесменнинъ халкы арасында сый-абырай да оьсип барады.
Баслап олардынъ курылыс алатларынынъ базасы оьз азбарында орынласкан эди. Буьгуьнлерде ол Терекли-Мектебтинъ кубылакуьнбатар бетинде ерлесип,
оьрленип, кенъееди, разы болган алувшыларынынъ да саны куьннен-куьнге оьседи. Арслан Алимханович дуныядан кешкен сонъ, сол курылыс алатлар базасын эм «Казбек» АЗС-ын онынъ ян косагы Насипхан Зекерьяевна басшылайды. Сол АЗС исин юритуьвде сулыбын оьстируьвде ога абасы Зейнап Алимхановна насихатшысы болып келеди. Ол увылынынъ касында турып, яшав бойы алган бай сулыбы, билими мен боьлисип, ога оьспеге, оьрленмеге ярдамын этеди.
Кыскаяклыдынъ коьп йыллар бойы яваплы толтырган иси Эли мен белгиленмей калмады. Ис ветераны коьпйыллык емисли иси уьшин РФ коьлик министерствосынынъ министри, Дагестан Республикасы, Ногай район етекшилевлери атыннан Сый грамоталарга тийисли этилген.
Наьсипли ана оьз ян косагы ман эки аьвлетлери Тимур эм Айгульди тербиялап, яшавдынъ тувра йолына салдылар.
Кызлары Айгуль ян косагы ман Махачкалада юристлик университетин тамамлаган, буьгуьнлерде Москва каласында суьйген иси мен каьрлеп, уьш аьвлетин оьстиреди, а тунгышлары
Тимур – бес балалы аьел иеси. Буьгуьнлерде кыскаяклыдынъ сегиз йиенлери эм уныклары тетейин эм энесин оьз етимислери мен куьезлендирмеге асыгадылар. Сол тувылма аьдем уьшин уьйкен наьсип!
Г.Нурдинова.
Суьвретте: Насипхан Байманбетова.
