Савлай дуныя Уллы Аталык согысында совет аьскершилери мен янын да, канын да аямай алган енъуьв куьнин кенъ байрамшылайды. Бу куьнге багысланган шаралар Ногай районынынъ китапханаларында да оьтти. Соьйтип, Карагас авыл китапханасында Уллы Енъуьвдинъ 81 йыллыгына багысланып, шаирлик конкурсы озгарылды. «Согыс данъкыннан – Россия бирлигине» деп аталган конкурс сырт зонасынынъ китапханашылары ман уйгынланган, 6 авыл – Уьйсалган, Орта-Тоьбе, Карагас, Куьнбатар, Бораншы, Червленные Буруны ярыста катнастылар. Катнасувшылардынъ арасында китапханашылар эм окувшылар бар эди.
Тоьрешилер Ногай районынынъ ортак китапханалар тармагынынъ директоры Сабират Абубекерова, ДР Ямагат палатасынынъ агзасы, Ногай районынынъ Хатын-кызлар
советининъ председатели Асият Манкаева, Ногай патшалык драмалык театрынынъ артисткасы Салимет Ханмурзаева болдылар. Шарада Россия акында ДР ат казанган
артисткасы Зульфия Аджигеримова эм Орта-Тоьбе авыл мектебининъ окувшысы Эльфида Кошанова йырладылар.
Шарады Карагас авылынынъ китапханасынынъ етекшиси Надия Ханмурзаева ашты. Сонъ сахнага Дагестан Республикасынынъ ат казанган маданият куллыкшысы Алимет Аблезовадынъ етекшилеви астында «Лашынлар» биюв ансамбли шыкты. Согыс акында ятлавды 5 ясындагы Рамазан Нуков окыды. Конкурс катнасувшылары ятлавларды ийги этип окыдылар, олар бек аьруьв этип аьзирленгенлер шарага. Катнасувшылардынъ биревлери согыс акында видеороликлер кулландылар.
Баьри катнасувшыларга да сертификатлар тапшырылды. Биринши орынды Орта-Тоьбе авыл мектебининъ окувшысы Айзана Абубекерова алды, экинши орынга Куьнбатар авылдан Саида Шокаева тийисли болды, уьшинши орынды Ирада Бодениязовага бердилер (Уьйсалган авылы).
Дагестан Республикасынынъ ат казанган маданият куллыкшысы Сабират Абубекерова аьр бир катнасувшыга оьз йоравларын айтып, анализ этти. Разылык соьзлерин
катнасувшыларга эм уйгынлавшыларга жюри агзалары Салимет Ханмурзаева эм Асият Манкаева айттылар.
Согыс акында ятлавлар коьрген, сезген затлар акында язылган. Олардынъ бас маьнеси – яв ман куьресуьвге аьзирлик, енъуьвге, ювыклардынъ коьтергишлевине сенуьв. Шаирлер сол заман тынышлык, наьсип уьшин биз кайдай баа тоьлегенимиздинъ акында айтканлар. Соны биз, бизим яс несилимиз билмеге керекпиз.
Согыс коьп шаирлерди тувдырды. Олар язган ятлавларды биз аьли неше кере де окырмыз. Оларды мутпага ярамайды. Олардынъ акында уьндемей коймага ярамас.
Г.Бекмуратова.
Суьвретте: конкурс катнасувшылары.