Аьр бир аьдемнинъ бактысы акында китап язбага болар деп босына айтпаймыз. Бизге, язувшыларга, журналистлерге, кайдай хабар да ойламага, язбага кызыклы болып калады. Балалыкты эсимизге алсак, юректеги сезимлер толкын-
ласып, янымызды шымтып-шымтып алады. Боьтен де, ол инсанлар аьлиги заманда да сизинъ касынъызда болса.
Янъыларда элимиздинъ окытувшылары кеспи байрамын байрамшыладылар.
Бу кеспиди сайлаган инсанлар – баьтирлер. Саьбийлерге тек билим берип калмай, оларга юреклерин савкатлайтаган
аьдемлер уьшин баьримиз де оьктемсиймиз. Солардынъ ишинде – Орта-Тоьбе авыл мектебининъ баслапкы классларынынъ окытувшысы Эльбийке Абибулла кызы Сагиндикова.
Эльбике Шамбилова (бу онынъ кыз тукымы) асылы ман Уйсалган авылыннан. Абибулла Эсперген увылы эм Танбике Шувак кызы Шамбиловлардынъ аьели коьпбалалы эди, сол йылларда аьелде 8-10 бала тувып-оьсетаган эди. Соьйтип, олардынъ татым аьелинде мен де бала заманымда коьп болганман. Эсимде, тепседи толтырып, Танбикеабай ынъкал этетаганы, мен де баьриси мен косылып ашайтаган эдим. Ийги заманлар эди, тапкан затын оьзлери де ашап, баскалар ман да боьлисетаган эди аьдемлер. Мектебке бирге бардык. Эльбийке ийги окувшылар-дынъ сырасында эди класста, эсап дерисин куьшли билетаган эди. Мен оьзим эсап пан коьп ийги дос тувыл эдим (аьли де солай), сога коьре болар кыймасым ман куьшли сукланатаган эдим.
Бала заманнан алып Эльбийке окытувшы болмага суьетаган эди. Ойынларымызда да окытувшы-окувшы боламыз,
Эльбийкеден бир ийги окытувшы болатаганы эсимде калыпты. Билими сол заманда да куьшли эди. Оьзи сезгир эди сол заманда да. Мен ясыртын ятлавлар язаман блокнотка, соны да сезетаган эди.
Мага коьре, бир кере мен ога ятлавымды да окыдым.
Дослыгымыз окув йылларда басланды, Аллага шуькир аьли де бир-биримизди йойытпаймыз. Кашан да, тез-тез коьриспеге заман болмайды, ама яманда да, яхшыда да бир-биримизге табылганымыз да аьруьв деп ойлайман.
Эльбийкеди баслапкы классларда эсиме аламан. Кишкенекей кызалак, ак тоны бар эди, елли куьнлерде уьйге бирге кайтамыз, оны бир класста окыйтаган Мурзабий Биймурзаев (оькинишке, арамызда йок) алып кетеди. Мага коьре, оны ел ушыртып аькетеектей болатаган эди, белки, сол зат уьшин коркатаган болгандырман, эсимде калыпты.
Сегизинши классты битирип, Орта-Тоьбе авыл мектебине окымага да бирге кеттик. Сол йылларда Эльбийке окытув-шы болмага токтасты. Меним эсимде, ол 10-ншы класста, язлык тыншаювларда Махачкала каласына кетип, педагогикалык институтында курслар оьтип келди.
Сонъында пединститутын окып та битирди.
Мен оьзим мен окыган тенъдосларымды разылык пан эсиме аламан. Олар аьр заманда да меним касымда. 10-ншы классты битирип, выпускной кешлиги болып турган заманда анам тайды деген хабар келди. Мени мен бирге авылга кызлар кайттылар – Мадина Ахметова, Нафисат Аманиязова, Эльбике Шамбилова. Олар меним янымда эки куьн тур-
дылар, янымда кондылар. Меним эсимде, биринши кеше абам уьйине барып кондык, кызлар мени кушагына алып, бирге йылап уйклап калганымызды аьлиги заманда да коьзяслар ман эскеремен. Сол куьнлерден 42 йыл кетсе де, мен оларга кайтип куьшли разы.
Эльбийке буьгуьнлерде районымыздынъ билимли окытувшыларынынъ бириси деп белгили. Россия Федерация-
сынынъ билимлендируьв тармагынынъ сыйлы куллыкшысы, Дагестан Республикасынынъ билимлендируьв отлични-ги Эльбийке Абибулла кызы Сагиндикова кайратлы иси уьшин Сый грамоталары, Разылык хатлары ман савгаланган. Ол – коьплеген конкурслардынъ енъуьвшиси, форумлардынъ катнасувшысы. Эндиги йыл окытувшы етинши выпускын йолга салмага ниетленеди. Эльбике Абибулла кызынынъ выпускниклери туьрли ерлерде элимиз бойынша куллык этедилер, биринши билимди берген окытувшыга разылык соьзлерин айтадылар. Янъыларда выпускниклерининъ бириси Нуржамал Айдабулова окытувшы куьни мен кутлап, булай  соьзлер язган: «Сиз бизге дайымларга окув яшавымыздынъ бас инсаны болып калгансыз, бизим биринши окытувшымыз. Сиз бизди мектебтинъ босагасында хош алып, биринши арыпларды окыпязып уьйреттинъиз. Энъ де маьнели – Сиз бизди досласып уьйреттинъиз. Сизинъ шыдамлыгынъыз, анадай болып, каьр шегуьвинъиз, танъ куьлемсиревинъиз бир заттан да коркпаска эм йигерли алдыга бармага ярдам эткенлер. Биз уьйкен болдык, ама сизинъ йылувлыгынъызды аьли
де сеземиз. Бизим яшавымыздынъ басы сондай яркын эм сенимли болган уьшин сизге савбол айтамыз. Берк ден савлык, уьстинликлер эм узак оьмир йораймыз».
Мага коьре, сондай разылык билдируьв – окытувшыга энъ де уьйкен савга.
Буьгуьнлерде Эльбике Абибулла кызы ман бирге онынъ окувшылары да ислейдилер – Рустам Кишинеев, Иса Зарманбетов, Фаина Халилова. Орта-Тоьбе авылында бактысын да тапты Эльбийке-кыймасым. Бирге окыган
тенъимиз Эсманбет Сагиндиков пан аьел курып, кырк йылга ювык яшайдылар.
Аьелде бир увыл, эки кыз оьстилер, аьлиги заманда олар оьз бактыларын бардырадылар. Уныкларга эм йиенлерге куьезленип яшайдылар Эсманбет эм Эльбийке.
Буьгуьнлерде Эльбийке кыймасым оьзининъ 60 йыллык мерекесин белгилейди. Баьри ийгиликлерди йорайман ювык
аьдемиме. Мынъ кабат болсын суьйиниш, уьстинлик эм Кудай ман берилген оьмир.
Г.Бекмуратова.
Суьвретте: Э.Шамбилова эм Г.Бекмуратова (1982-нши йыл).