Маданият куллыкшыларынынъ куьни – ол оьнерли, белсенли, халктынъ коьнъилин коьтерген, яшавды ярык саьвлелерге толтыратаган аьдемлердинъ байрамы. Оьзлерининъ ис аьрекети эм яратувшылыгы ман олар инсанларга тувган ерине, ана тилине, оьз халкынынъ маданиятына суьйимликти тувдырадылар.
Авыл ериндеги маданият куллыкшысы – ол, белгили орыс айтувына коьре, оьзи эм тигуьвши, оьзи бийдай орувшы, оьзи муьйизде ойнавшы.
Бу соьзлер авыл клуб куллыкшыларынынъ исин толы кепте ыспатлайдылар. Тап соьйтип аьли 1986-ншы йылдан алып Ногай районынынъ Шумлелик авыл маданият уьйинде директоры болып Патимат Шахбанова да ислеп келеди. Ога дейим де ол бу авыл клубында методист болып бир неше йыл куллык эткен. Йогарыда айтылган соьзлерге коьре, Патимат оьзи йырлайды, бийийди, аккордеон кобызында ойнайды. Соны ман бирге ол аьр бир концертке яде байрам шарасына авыл ясларын, мектеб окувшыларын катнастырады. Оьзи бир неше ногай йырларды занъыратып йырлайды, ногай тилинде соьйлейди. Авыл ясларын даргин, орыс, ногай йырларды йырламага уьйретеди. Айтпага, коьп йыллардан бери
Шумлелик авылдынъ даргин миллетли яслары, район орталыгында озатаган байрам шараларында катнасып, ногай тилинде йырларды йырлап, бизди, ерли каравшыларды, тамашага калдырадылар. Бу баьри куллык, бир соьзсиз, Патимат Шахбановадынъ эм авыл мектебининъ аьрекети мен оьткериледи.
– Янъыларда биз Нариман, Батыр-Мурза авыл маданият уьйлери мен «Калай яшайсынъ, авылдас?» деген тема бойынша биргелес дослык шараларын да озгардык. Мундай йолыгыслар, концертлер район яшавшылары арасында татымлыкты беркитеди, биз баьримиз де аьдемлер эм бизим куванышымыз да, кайгымыз да бирдей экенин коьрсетеди, – дейди ол.
Оны коьп йыллардан бери районымыздынъ маданият тармагын етекшилеген ДР эм РФ ат казанган маданият куллыкшылары Нарбийке Муталлапова, Яхъя Кудайбердиев, ДР ат казанган маданият куллыкшысы Нина Халилова эм баскалар аьруьв таныйдылар эм неше кере де онынъ акында ийги соьзлерин айтканлар. Патимат кайсы бир шарага да Дагестан эм Россия халкларынынъ бирлик, дослык, татымлык сезимлерин коспага шалысады. Коьпйыллык намыслы эм ийги иси уьшин ол отыздан артык Сый грамоталары ман савгаланган, 2010-ншы йылда ога Дагестан Республикасынынъ маданият министри атыннан да Сый грамотасы тапшырылган. Быйылгы Маданият куллыкшылар куьни Патимат Омаровна уьшин эки кабат байрам, неге десе ол авыл маданият уьйин етекшилегенли де тувра 40 йыл толады.
– Меним уьшин маданият куллыкшылары – оьзлерин аямайтаган, оьз исин таза булактай суьйим мен суьетаган, шынты оьнер оты юрегинде янатаган аьдемлер, – дейди Патимат Шахбанова. – Бу иске урынган куьннен алып, кайдай ды бир шарады аьзирлев эм оьткеруьв уьшин не шаклы кыйын салмага, сценарий язбага, аьдемлер мен соьйлемеге эм оларды бирлестирип, клуб куллыгына келтирмеге туьсетаганын анълайсынъ. Элбетте, авыл маданият уьйлери уьйкен калалардагы маданият меканлары ман тенълесип болмайтаганын, техника ягыннан канагатлав эм ис аьллери эндиги де ийги болувды талаплайтаганын коьрип, авыл клуб аьрекетшилери аьлигиден де артык ислемеге болаягын сезесинъ.
Тек болса да, кайдай да бир байрам куьн тувган авыл клубында оьткерилетаган концертке келсенъ, коьнъилинъ кала яшавшыларыннан да артык шатлыкка толувын сезесинъ. Бизде, авыл ерлеринде, баьри зат та оьзимизше, айырым ян йылувлыгы ман аьзирленеди эм юрек оьзегиннен оьткериледи ше!
Бу соьзлер бизге аьр аьдем бактысында маданияттынъ маьнеси уьйкен экенин ыспатлайды, неге десе маданият бизим тек яратувшылык эм акыл-ой анъсатлыкларымызды ашып калмайды, ол аьдемди аьдем этеди.
М-А.Ханов.
Суьвретте: Патимат Шахбанова.
