Элимизде Президенттинъ белгилеви мен 2008-нши йылдан алып шилле айынынъ 8-нши куьнинде Аьел, суьйим эм алаллык куьни байрамшыланады. Россияда аьел энъ де йогары баалык болады. Элимизде балалыкты эм аналыкты коьтергишлев, яс эм коьпбалалы аьеллерге ярдам этуьв – биринши орынларда турады. Несилден-несилге аьеллерде Тувган Эл уьшин куллык этуьв аьдетлери коьшеди. Берк эм татым аьел ямагатлыктынъ негизи, онынъ келеектегиси болады.
Байрам куьн бир-бирисине суьйим сезими болып, берк аьел курып, коьп йыллар узагына бирге наьсипли яшав яшайтаган,
авыл-элге пайдалы болган аьдемлер тербияланган аьеллерге эс эм сый этилинеди. Олардынъ сыйына аьлемет шаралар озгарылады эм медальлер де тапшырылады.
Ясларга коьрим болган эм ясуьйкенлерди сукландырган аьеллер Ногай районында аз тувыл.
Татым эм каьр шегуьв аьл бийлейди Батыр эм Мадина Батыровлардынъ аьелинде. Олар 2013- нши йыл аьел курганлар, аьли
болса алты баласына суьйимин аямай савкатлайдылар. Мадина Махачкалада Дагестан патшалык университетининъ юридический факультетинде билим алып, Ногай район администрациясында юрист куллыгын юриткен, «Яслык» яслар орталыгында да ислеген заманлары да болган.
Аьел басы Батыр – курувшы. Кайратлы яслар бирге Москва каласында да аьрекетлегенлер, аьли Терекли-Мектеб авылына кайтканлар.
Батыр асылы ман – конъысы Шешен Республикасыннан, ол – бек куллык суьер эм яваплы инсан, хатынына эм балаларына
сенимли тирев болады.
Батыр эм Мадина Батыровлар оьзлери тувган аьелдеги аьдетлерди тутадылар, мунда бир-бирине сый этуьв, анълав, шыдамлык,
баьри исте де ийги затты коьруьв эм сезуьв болады. Яслар балаларына тийисли билим эм ийги тербия беруьвге де уьйкен эс этедилер. Балалары мектебте эм балалар бавында оьзлерин ийги яктан коьрсетедилер.
«Шынты наьсип – ол саьбийлердинъ наьсипли болувында, олардынъ юрегинде рахатлык болса, сога коьре биз оларга ийги
болсын деп шалысамыз», – соьзин бардырады тандыр саклавшысы.
Ювык аьдемлер – ол бактыдынъ савкаты, аьр бирев сонынъ баасын билуьв керек. А солай болса, наьсип те, тил бирлик те келер.
Берк аьел тек бир куьннинъ ишинде курылмайды. Ол ийги касиетлерден, тийисли ерде уьндемей коювдан, йолдасынънынъ мыратларына эс этуьвден туьзиледи.
Нурият Кожаева.
Суьвретте: Батыровлардынъ аьели.
