СВО катнасувшысы

Автор Магомет- Али Ханов

Халкымызда: «Шалкак болмай, шанъ болмас, шагында шанъ шыгармас эр болмас» деген бурынгы йырдынъ шувмагы аталардан калган алтын соьзлер сырасында айтылады. Бу соьзлердинъ акыйкатлыгын шайытлап буьгуьнлерде россия аьскерлерининъ согыс спецоперациясында Ногай шоьллигимиздинъ де 200-ге ювык увыллары йигитлерше катнасадылар.

Эл болган ерде баьтир бар,

Тек коьринъиз баьтирди.

Душпанга турган аьзир бар,

Тек сезинъиз аьзирди.

Баьтир мен аьзир косылса,

Оьсер элдинъ даьвлети.

Баьтир мен аьзир согылса,

Кашты элдинъ куьдирети, –

деп язган оьзининъ «Аталардан оьсиет» деген ятлавлар циклында замансыз яшавдан кеткен ногай шаири Солтанбек Аджиков.

Сондай ногай увыллардынъ бириси, эндигиси ога баьтир деген атты коспасак, соьзимиз толы болмас, Алан Авилкеримов согыс спецоперациясынынъ баслапкы куьнлериннен алып куьллелер сызгырган, ядыралар ярылган дав аьрекетининъ белсенли катнасувшысы болып келеди.

Алан Руслан увылы 2020-ншы йылда Москвадагы Кызыл байраклы йогары ортак аьскер командалык Ленин эм Октябрь революция орденлери мен савгаланган училищесин окып кутарган эди. Тувган Аталыгына куллык этуьвге офицер антын берген яс авылдасымыз соны эндигиси оьз кыйыны ман аклап баслайды. 2022-нши йылдынъ 24-нши февралиннен алып олардынъ аьскер боьлигин Украинага киргистедилер эм сонда Алан мотострелковый взводтынъ командири болып эр борышын толтырады. Сол йыл язда олардынъ взводы нацистлер мен согыска кириседи. Урыстынъ кайнавлы аьсеринде Аланнынъ аягына душпаннынъ тобынынъ бир кесеги тийип яраланады. Сога да карамастан, аягыннан кан шубыра берсе де, йигерли лейтенант дав ериннен оьзининъ йолдасларын кавыфсыз якка шыгармага уьлгиреди. Сол согыс аьсеринде коьрсеткен йигерлиги уьшин ол «Йигитлик уьшин» деген медаль мен савгаланган. Быйыл болса яс офицерге дав майданында шыныккан шынты эрлиги уьшин «Эрлик» ордени де берилди.

Ата – уьлги улына,

Савыт алып колына

Душпан йолын ол бувса.

Элин явдан саклаган,

Ата йолын ызлаган,

Улы куьез атага.

Картлар сыйын аклаган,

Куьшсизлерди яклаган

Улы куьез анага, –

деген С.Аджиковтынъ соьзлери бир шексиз Алан Авилкеримовка келисли, неге десе ол атасы, аьли тийисли тыншаювда болган подполковник Русланнынъ, тувган нагаш атасы, Уллы Аталык согысынынъ катнасувшысы, лейтенант Ажиакай Акманбетовтынъ (Алла ога тынышлык берсин) офицер йолы ман алдыга барады. Алдыга, оьз элининъ енъуьвине.

«Улы куьез анага» деген соьзлер Аланнынъ анасы Динара акында айтылгандай. Ол белгили фольклор йыювшы, язувшы, журналист Тагир Акманбетовтынъ кызы, аьлиги заманда Ставрополь кала янындагы Михайловск каласында балалар бавында тербиялавшы болып куллык этеди эм, элбетте, увылы уьшин аьр бир анадай болып кыйналады, куьтеди. Болса да ана юреги Алладынъ аты ман ийгиликке сенеди эм сондай йигит увылы уьшин ишиннен уьндемей оьктемсийди.

М.Ханов.

Суьвретте: Алан Авилкеримов.