Тезден, келеек киши юма куьнинде, республика етекшиси Сергей Меликов ДР Халк Йыйынына каратылган аьдеттеги йылсайынлык Язбасы ман шыгып соьйлеек. Ол – бизим республикамыз уьшин маьнели политикалык оьзгерис.
Аьдеттегиндей, ДР Аькимбасынынъ Язбасында дайым да республикадынъ туьрли тармакларынынъ (экономика, билимлендируьв, социаллык, савлык саклав, туризм
эм баскалар) оьрленуьви мен байланыслы маьнели темалар коьтериледи. Оьткен йылда Дагестан Оькимети эм ДР Халк Йыйыны алдында аян борышлар салынды. Йыл бойынша экономикадынъ оьрленуьви, инфраструктура, электроэнергия ман канагатлав тармакларында аян ислер юритиледи, аьдемлердинъ яшав сапатлыгынынъ артканын шайытлайтаган сырагылар эм баска ийги як туьрленислер коьринеди. Ама, етисилген уьстинликлерге карамастан, бизди яшавга шыгарылмага керек янъы борышлар куьтеди. Бизим республикамыздынъ армаганда оьрленуьви уьшин уьйкен болымлыгы бар, эм
оны, регион етекшиси белгилегенлей, яшавга шыгарувга уьйкен эс каратпага керек. Быйылгы Язбадада, менимше, бас темалардынъ бириси эсабында республикада туризмди эм туристлик инфраструктурады оьрлендируьв мен байланыслы сорав коьтерилеек. ДР Халк Йыйынына каратылган былтыргы Язбасында регион етекшиси республикада туристлик кластерди оьрлендируьв бойынша шаралар акында хабарлаган эди, онда Дагестанда курортлык ерлерди курув бойынша проектлерди яшавга шыгарув темасы да коьтерилди. Соннан бери бу яктан аз куллыклар этилмеди.
Бизим республикамызда туризмди оьрлендируьв уьшин баьри аьллер де бар: эмлев сувлары эм увак кумы ман Каспий тенъизининъ кумлак ягасы, тав туризми эм альпинизми уьшин тавлар, коьп санлы табиат, тарих эм архитектура эстеликлери.
2024-нши йылдынъ ызгы айындагы билдируьвлерге коьре, «Индекс туристической привлекательности регионов России» деп баалавда Дагестан 0,45 индекс пен 6-ншы орынды бийледи. Сырт-Кавказ федераллык округында регион, Ставрополь крайын, Кабардино-Балкарияды эм Шешен республикады арт калдырып, 1-нши орынды бийледи. Оьткен йылда Дагестандатуризм оьрленетаганын кайбир сырагылар шайытлайды: айтпага, республикамызга туристлердинъ келуьви 5,7% арткан, 22,3 млрд маьнет акша оьлшеминде туристлик буйымлар этилген, «Туризм и индустрия гостеприимства» миллет проекти ишинде модульлик капиталлык тувыл амалларды ерлестируьв бойынша 9 проектлер яшавга шыгарылган, «Классная страна» эм «Больше, чем путешествие» федераллык программаларын яшавга шыгарув ниетте элимиздинъ туьрли регионларыннан Дагестанда 1,5 мынънан артык балалар эм яслар болып кеттилер…
2025-нши йылдан алып Дагестан «Пять морей и озеро Байкал» проекти бойынша савйыллык курортлар уьшин инфраструктуралар курувга субсидиялар алаяк тогыз регионлар санына кирген эм Дагестанда «Каспийский прибрежный кластер» деген проект сонынъ бир кесеги болады.
Дагестанда туризм экономикалык, социаллык эм экологиялык пайда аькелетаганы аян. Менимше, ДР Аькимбасынынъ быйылгы Язбасында соны ман байланыслы соравлар коьтерилеек.
Любовь Уразаева,
«Шоьл тавысы» республикалык газетасынынъ яваплы секретари.
