Бизим элимизде яс несилдинъ патриотлык тербиялавына кайсы заманларда да уьйкен маьне берилген. Аьлиги, Куьнбатар эллер бизим Россияга карсы турувда бирлескен заманда сол иске бас маьне бермеге тийисли болады. Сол ниетте мектеблерде туьрли шаралар озгарылады, баьтирлер мен йолыгыслар уйгынланады, окувшылар сочинениелер язадылар. Аьр бир аьелдинъ оьзининъ баьтири, оьзининъ ярасы эм оьктемлиги бар. Карагас авылынынъ 9-ншы класс окувшысы Аиша Байманбетова СВО барысында эли уьшин яс янын берген акасы Гамзат-Хан Абдулов акында сочинение язган. Соны газета бетинде баспалаймыз.
Бизим заманнынъ баьтири – ким ол? Кайдай этип мен оны коьремен? Мен уьшин баьтир – ол оьзининъ яшавы яде эткен иси мен элине куллык этуьвининъ уьлгиси болган аьдем. Баьтирлер – ол туьрли йылларда тувган эм туьрли
кеспилер байырлаган аьдемлер. Баьтир – ол биревден де куьшкуватлыгы ман баскаланмаган инсан, ама ол Аталыгына, халкына суьйими мен, баскаларга ярдам этпеге эм коршаламага аьзирлиги мен касындагылардан баскаланады. Баьтир – ол коьп саьатлер узагына операциялар эткен врач, алты балады оьзи ялгыз оьстирген ана, тынышлы яшавшыларды коршалав уьшин, куьллелер асты-
на туьскен аьскерши.
Бар кеспилер, онда аьдемлерди куткарув бас борыш болады. Олар, бас деп, куткарувшылар, полиция эм МЧС куллыкшылары. Биз баьтирлери коьп уллы элде яшаймыз. Россия – бай эм уьйкен, сонынъ уьшин ога шапкынлык этип, байлыкларын байырламага суьйгенлер коьп. Ама кайсы заманларда да оны коршалаган алал увыллары болган. Уллы Аталык согысынынъ баьтирлери коркынышсызлык, йигитлик коьрсетип, фашистлерден элин саклаганлар. Сол согыста яслар да уьйкенлер мен бирге согысканлар, айтпага, Александр Матросов, Зоя Космодемьянская, Зина Портнова, Леня Голиков эм коьп баскалар. Кимди бу куьнлерде баьтир деп айтпага болады? Мага коьре аьлиги заманнынъ баьтирлери – СВО-да катнаскан аьскершилер. Бу кеспиди аьр ким сайлап болмайды, оны юреклери Элине суьйимге толган яде ата-аналарынынъ
йолын алганлар сайлайдылар. Сондай йигитлердинъ бириси меним акам Гамзат-Хан Мурадинович Абдулов эди. Онынъ атасы Шешен кампаниясында катнаскан. Гамзат-Хан онынъ йолын алмага суьйип, нацистлерди сокпага Украинага кеткен. Бала заманнан алып, Гамзат-Ханнынъ юреги патриотлык сезимлерге толган. Ол атасы, тийисли тыншаювдагы майор Мурадин Гамзатович Абдулов, ислеген аьскер ьгарнизонларда оьскен.
Мен ойлайман, аьр бир аьдем согыска барып болмас эди. Яслардынъ оьз эрки мен явды сокпага кетуьви йигитликке эсап. Гамзат-Хан бизим уьйкен кайгымызга 2024-нши йылдынъ караша айынынъ 24-нши куьнинде янын берген. Ога тек 22 яс эди. Ол кыска, ама йигитке тийисли оьмирди яшады. Гамзат-Хан СВО барысында явдынъ артиллериясынынъ атысы сырагысында оьлген. Ол согыс спецоперация озган ерде борышларды 2024-нши йылдынъ
шилле айында толтырып баслаган. Гамзат-Хан Абдулов радио-электронный куьрестинъ тамада операторы болган. Исин толтырувда йигитлик коьрсеткен. Согашайыт болады онынъ командирининъ айткан соьзлери. Гамзат-Ханнынъ акында эс тек онынъ кардаш-ювыкларынынъ тувыл, ердеслерининъ юреклерин-
де де яшар деп ойлайман. Бизим борыш – СВО катнасувшылары акында эсти саклап, несилденнесилге коьширмеге.
Н.Кожаева.
Суьвретте: А.Байманбетова
