Ногай район администрациясында ямагат ваькиллери мен кенъесуьв йыйыны болып оьтти. Йыйынды район басшысынынъ орынбасары Рашид Шангереев юритти.
Шарадынъ бас соьзининъ маьнеси – район орталыгы Терекли-Мектеб авылынынъ паркынынъ сырт ягында бир авылдасымыз (атын эм тукымын язбаска тилеген) оьзининъ байыр ер участогын баска биревге саткан. Сол аьдем район архитекторы Алибек Муллаевке келип парк ишинде байыр уьй курылысын басламага ыхтыяр беруьвди тилеген. Сол себептен район администрациясынынъ етекшилери Терекли-Мектеб авылдынъ ямагат ваькиллерин бу соравдан тура олар ман кенъеспеге шакырдылар.
А.Муллаевтинъ айтувы ман, сол ерде план алдынгы авыл аькимбасы Арслан Байманбетовтынъ (яткан ери ярык болсын) карары ман берилген. Район администрациясы сонда янъыларда планды сатып алган аьдемлерге уьй курылысын басламага ыхтыяр бермеске токтаскан.
Болса да, бу планды алган аьдемнинъ закон бойынша ерге иелиги акында керекли
документи бар болса, ол судка шагынмага эм суд сол ерди ога калдырмага болады.
Коьтерилген сорав ман байланыста авыл ямагатынынъ ваькили Софья Тангатарова район паркынынъ ери болып саналатаган район Халк яратувшылык уьйининъ онъ бетинде 12 авыл яшавшыларга курылыс уьшин берилген ер участоклары акында соьзди де козгады. (Сонынъ
акында материал газетамыздынъ 2018-нши йылда шыккан номеринде баспаланган).
Онынъ соьзи мен, сол ерлер оларды алганларга дурыс берилмеген, неге десе район паркынынъ ери – халкымыздынъ тарих эм табиат эстелиги болып саналады. Болса да, сол аьдемлер ерлерин закон бойынша оьзлерине беркиткенлер эм суд олардынъ байырлыгын коршалайды. Тек бу аьдемлер де эм баьримиз де ойлап карамага керекпиз: район паркы – ол бизим тарихимиз, район орталыгына салкынлык, аллы-ясыл ыспайлык берип туратаган еримиз. Эгер биз баьримиз де соннан оьзимизге ерлер алып байыр курылыслар, уьйлер, туькенлер
салып турсак, сол паркымыздан не зат калмага болады? Биз оны аявламасак, сакламасак, ким аявлаяк эм саклаяк? Парк – бизим савлайы ногай халкымыздынъ бети эм коьрки. Сол себептен клубтынъ яныннан ерлер алган аьдемлер терен ойламага керек боладылар.
Йыйында ТереклиМектеб авыл басшысы Марат Кулунчаков катнасты эм коьтерилген соравлардан тура оьз ойларын айтты. Ол район паркынынъ межелери токтастырылганын билдирди эм соларды биревдинъ де бузбага эм оьзине мунда байыр курылыска деп ер алмага
ыхтыяры йок экенин де айтты. Ол оьзи парк ишиннен уьй салмага суьетаган аьдем мен эм Халк яратувшылык уьйининъ ювыгында ер алган аьдемлер мен соьйлеегине сендирди.
Кенъесте район орталыгын коьрклендируьв, санитарлык аьли эм баска маьнели соравлар ойласылды.
М.Ханов.