Согыс спецоперациясы. Бу оьмирлерге сакланаяк тарих болады. Мунда аьдем бактылары, касиетлери, солар баьриси де кара бояк пан ак кагытка язылып калаяк.
Согыс спецоперациясы басланганлы аз заман оьтпеди, не шаклы юзлеген аьдемлердинъ яшавлары курман болды, атасыз тувган балалар, кара явлык тарткан аналар…
Сол да аьдем бактысы.
Элимизде де коьп зат туьрленди, аьдем касиети беркиди…
Арамызда Россиядынъ Баьтири деген атка тийисли болган эр йигилер, туьрли йигерли абытлар этип, савгаларга тийисли этилген аьдемлер саны да оьсти…
Элбетте, коьлемлик билдируьвлер амаллары аркалы тынышлы яшавшыларга еткерилетаган хабарлардынъ бас келбетлери тек баьтирлер болып калмайдылар, сонда олардынъ савлай яшав оьмири…
Оьткен оьмирде неше дав болган болса да, аьлиги заманда оьмир суьргенлердинъ
коьбиси дав, согыс дегенди басыннан оьткергени йок эди. Оьзек те, бирем-сирем ясуьйкенлер Уллы Аталык согысын коьрген, катнасувшысы да болганлар бар. А буьгуьнги аьскершилер бизим арамыздан – биреви авылдасынъ, баскасы – аданасынъ эм сондай баскалар. Олар– тири аьдемлер.
Сондай йигерли йигитлердинъ бириси – ердесимиз Руслан Байтемир увылы Нургишиев.
Ол согыс спецоперациясы озып турган ерде инструктор болып ис аьрекетти бардырады. Анълатып озайым, Русланнынъ ис борышы – аьскершилердинъ тактический эм отлы аьзирлигин тергев.
Согыста болган киси, оьз яшавы, коьбисинше, онынъ оьзининъ аьзирлигининъ оьлшеминнен эм сапатлыгыннан себепли болатаганын аьруьв анълайды.
Руслан Нургишиевтинъ куллыгынынъ талаплавы – иси бойынша соны аьскершилерге еткеруьв. Согыста энъ де маьнели – тыпаклык эм бирлик. Мен исим бойынша коьплеген СВО катнасувшылары ман йолыгысканман эм хабарласканман. Бу ерде солардынъ биревининъ
айткан соьзи эсиме туьседи, боьлисейим:
– Ийги аьскерши болар уьшин, энъ де баслап, йолдасларынъ акында ойламага керексинъ, сенинъ аьскерлик аьзирлигинъ де коьп зат акында айтады: йолдаслардынъ яшав оьмирине зыян да келмеге, энъ де баалысы – яшавы да куткарылмага болады…
Руслан – бизим арамызда тувып-оьскен йигитлер саныннан. Онынъ оьсуьви, инсан
болып кепленуьви яшавдынъ тынышлы заманына келген. Ол бизим маданият орталыгымыз
деп саналатаган Терекли-Мектеб авылында яшав оьмирин бардырган аьдем болады. Кишкей Аталыгым деп шоьллигимди санайды.
Руслан Байтемир увылы ерли мектебте окыган, оннан сонъ, ол Иран ерлеринде Казвин каласында болып, английс эм кызыл бас (перс)тиллерине уьйренген. Оннан сонъ,
Дагестан Республикасынынъ педагогикалык окув ошагынынъ «История эм юриспруденция» факультетинде окып, кеспи алган.
Ама бакты соьйтип буйырды: ол оьзининъ ис аьрекетин бир куьн де алган кесписи бойынша бардырмады. Яшав деген сондай зат, баьри зат та биз суьйген, йораган шаклы болмайды. Онынъ баслапкы аьрекети маданият пан, сонъ савлык саклав тармаклары ман байланыслы болды.
2021-2022-нши йыллар. Ол Ульяновск каласындагы ава окув орталыгында аьзирлик
оьтип, АВИАСТАР заводында ушув аппаратларды йыювшы болып ислеп баслаган.
2024-нши йылда болса, Руслан, элге яв шапканда, оны коршалавга турды, ол контрактлы ис аьрекетти баслады.
Аьлиги заманларда Руслан Нургишиев
– Эл коршалавшылар арасында эм алдыда. Аьскершилик аьрекетининъ ветераны деген
атка да тийисли этилинген. Русландай йигерли йигитлеримиз аз тувыл, аьр бирисининъ яшав оьмири бизге баалы болады, аьр кайсы ердесимизге, аьскершимизге де ден савлыкты, наьсипли оьмирди йорайман.
Ис борышыма коьре, СВО катнасувшылары акында язаман, аьр кайсысы да оьзимнинъ бир ювык аьдемимдей болып калады, оннан сонъ да коьп заманларга дейим олардынъ бактылары ман кызыксынаман, «Кайда юрселер де, аман болсынлар» деген тилегимди де тилеймен.
Аьлиги макаламды тамамлай келип, тагы да бир Русландай коршалавшыдынъ соьзлерин келтиремен:
– Согыста аьскерлик рух (боевой дух) бек керек. Халк арасында айтылганлай, «коркаш– оьледи». Мунда оьзинъе эм этип болаяк исинъе сенмеге керексинъ. Бир заман, бир
зат келеек деген мунда ялган оьтирик яде бос затка ынанув болады. Эм энъ де маьнели –
янынъдагы йолдасынънынъ алаллыгы…
Ак юрегимнен ердеслериме, согыс майданынынъ кумын таптап юргенлерге ден савлыкты, тынышлы яшав баьри ерде де болганын йорайман. Оларды саклаган аналарга тек шыдамлык, увылларга болса, аналарынынъ дайым тилеклери, разылыгы астында болганды сагынаман.
Аналар аягынынъ астында – балалардынъ еннети.
Г. Сагиндикова,
РФ Журналистлер союзынынъ агзасы.
Суьвретте: Р. Нургишиев. (Суьврет ис аьрекет баратаган ерде алынган, йигиттинъ анасы ман мага еткерилген).
