Кайсы ата-ана парахатлыкта яшар, эгер увыллар элди коршалавдынъ алды бетинде турган болса.
Туьрли эллер араларында, бирэки аьдем арасында болсын давласув деген ийги зат тувыл, аьр кайсысы да биревге зыян келтиретаган болып шыгады.
Россия эм Украина, дурысынша, бу бир элге Куьнбатардынъ салдарлы ерлерининъ властьлери «куйылган», баьриси биригип, бириншиге карсы шыгып, уьш йылдан артык заман согыс спецоперациясын озгарадылар.
Аьли нацизм басын айлак коьтермеге суьетаган заман, ама уллы Россиядынъ да яв алдында тизге шоькпеге бир ниети де йок. Бизим Аталыгымыз аьр кайсы заманларда да оьзининъ куватлыгы ман данъкланып келеди. Элдинъ алдында турган йигерли йигитлер, янъы технологиялар аркалы курылган коьликлер, аьскершилик техника – сол тувыл ма куват деген де?! Аз болса, тылда куллык этетаган инсанлар саны куьннен-куьнге оьспесе, кемимейди. Бизим кишкей Ногай районымызды алып карайык, аьр бир авыл еринде аьскершилерге
гуманитарлык юк аьзирлевде, тийисли ерине еткеруьвде белсенли исин бардыратаган куьплер бар.
Коьбиси авылларда бу ис маданият уьйинде, мектеблерде уйгынланадылар.
Дагестан Республикамыздынъ Ногай районында йылдынъ бир айы да, айдынъ бир юмасы да бос кетпейди, олай дегеним, аьр юма сайын дав майданга бир яде артык шилтер согылып йибериледи, аьскершилерге ас-сув аьзирлевди бирев де маьселе деп санамайды. Тек «гуманитарлык юк кетпеге аьзирленеди» деген хабар шыкса болады, шетте карап калатаган аьдемлер саны йокка эсап. Ким не зат табады, согыс майданда аьскершиге не керекпеге
болады, соны аькелип, кетеек юкке косады. Кыскаша айтканда, Ногай районымызда СВО катнасувшысына ярдамга косылмаган, олар уьшин яны авырымаган аьдем болмас.
Ювыклары, увыллары дав майданда юрген аьдемлер болса, сонда кетеек гуманитарлык юкти йыйнавда, шилтер согувда, боьтен де, белсен катнасадылар эм сол куллыкларды уйгынлав да олардынъ ийинлерине туьседи. Олар бу куллыклардынъ белсенли юруьвине
коьп куьшти босына салмайдылар, неге десе сол аьдемлер аьскершилердинъ дав майдандагы яшавлары ман ювык таныс боладылар. Аьр кайсы исти де ким юриткени
бу ерде бек маьнели.
Аьли бизим соьзимиз яс оьспир акында болады. Аьскершилик шилтер согув да тыныш ис тувыл: бириншилей, заман, экиншилей, увак зереди алатаган ис. Ясуьйкен аьдемлерде шыдамлык бар, сога коьре олар бу исти аста-акырын бардырадылар, яслардынъ биревлерине ойын болып коьринеди, баскалары тез безип, кетедилер, бар араларында бу иске бек яваплы карайтаганлар да…
Орта-Тоьбе авылында шилтер согув, гуманитарлык юкти аьзирлевде белсенли катнасатаган хатынлар аз тувыл. Солардынъ биреви, СВО басланганлы бери яны тынышлык таппайтаган хатын – Сапуэт Даутова. Ога СВО айлак ювык таныс, неге десе эки увылы да дав майданга енъуьвди ювыклатувга оьз косымын этетаган йигитлер боладылар.
Буьгуьнги онынъ хабары сол шилтер согув акында:
– Яздынъ айлак исси куьнлеринде куллыгымыз бираз кери юрди. Анъламага болады, шилле,
туншык куьнлер…
Тек авылдынъ бир неше балаларын белгилемей болмайман: Картакаевлердинъ, Ярболдиевлердинъ йигит яслары, сырт якларга кеткен авылдасларымыздынъ балалары:
С.Абдулсаламов, М.Нурманбетов, С.Янмурзаев. Бу яслар келген куьн бир шилтер согылды деп айтпага болады, – дейди Сапуэт-абай.
Бу куьн оьспирлер согыс майдандагы йигитлерге оьзлерининъ ак юрекли йоравларын да видео аркалы айттылар. Сол тувыл ма ян майданнан дав майданга йиберилген йылувлык…
Г.Курганова.
Суьвретлерде: балалар шилтер сокпага келген куьн.