Ногай районында ис йорыгы ман РФ Государстволык Думасынынъ депутаты Султан Хамзаев болып кетти.
Ногай район администрациясында оьрметли конак пан район етекшилери, депутатлар, авыл басшылары, ямагат эм коьлем информация амалларынынъ ваькиллери йолыгыстылар. Шарады Султан Хамзаев оьзи ашты эм юритти. Сондай ыхтыярды
ога район етекшиси Джамалутдин Эсиргепов бергени депутаттынъ аьли бир неше йылдан бери Ногай районнынъ сыйлы гражданини деген атты юритуьви мен байланыслы болар деп ойлайман. Элимиздинъ оьр парламентининъ депутаты ман йыйылганлар арасында болып оьткен ашык хабарласув келеяткан янъы окув йылы эм Билимлер куьни мен байланыслы эди.
Сол саялы парламентарий оьз соьзин республикадынъ эм Ногай районнынъ билимлендируьв мектеблерининъ янъы окув йылына аьзирлиги эм соны ман байланыслы соравлар эм маьселелер акында юритти. Айтпага, Султан Хамзаев янъыларда аьлиги заманда яслар эм оьспирлер аьвлигетаган электронлы сигареталарды койдырув
акында сорав каралганын билдирди. Сондай сигареталар баска туьрли таьмеки мен бирге савлыкка зарарлы деп саналадылар. Элбетте, сондай соравды депутаттынъ баьри коллегалары да яклаганлар эм закон кабыл этилинген.
– Бизде аьли А.Джанибеков атындагы орта мектеби бойынша ийги хабарлар бар. Биз сондагы ярастырув ислери уьшин парламентте коьп куьрестик, ол зат бизге енъил болмады, неге десе капиталлык ярастырув ислерининъ оьлшеми кемитилди, а соны ман бирге А.Джанибеков атындагы мектеб меканында куллыклар коьп эдилер. Буьгуьн мен депутат
тергеви бойынша ярастырув ислери калай юрип турганын караякпан. Дурысында да, бу мектеб пен Тюбе авыл мектебинде де капиталлык ярастырув ислерин юритпеге ыхтыяр алувга биз коьп кыйын салдык, – деди Султан Хамзаев. Депутат курылыска яде ярастырувга деп шыгарылган аьр бир бюджет маьнети ерине етискенин яклайтаганын билдирди. Ол аьлиги заман авыр, Россияга карсы 30 мынънан артык санкциялар киргистилгени акында айтты. «Дуныяда бир элде де сондай зат болмаган. Болса да сол ок заманда коьрмеге керекпиз: патшалыгымызда промышленность оьседи, оькимет социаллык борышларын толтырады, социаллык объектлери курыладылар эм соны ман бирге промышленность потенциалы да артады. Сол себептен биз де Дагестанда бу яктан кери калмага керек
тувылмыз. Дурысын айтсак, заман енъил тувыл. Сонынъ уьшин аьли бар болган ресурсларымызды биз не шаклы пайдалы, билимли эм сапатлы кепте уьлестирип болаягымыз бизим аьр биримиз бен байланыслы. Сонынъ акында аьли Президент оьзи де айтады, ол сондай борышларды Оькимет, губернаторлар, субъектлер басшылары,
парламент алдыларына салады», – деп белгиледи ол.
Хамзаев оьзининъ соьзинде коьп маьселелер мен соравларды козгады.
– Аьли биз коммерциялык организацияларына аьне яде мине ис кесписи акында дипломларды, шайытламаларды беруьвди закон бойынша токтатканмыз, боьтен де педагоглардынъ кесписи беттен. Бу «туькен» эндиги ябылды! Сондай «туькенлер» сав элимизде бек коьп эдилер. Мен бизим балаларды тек профессионаллар эм тек йогары дережеде окытканын суьемен, – деп билдирди ол. Ол сол ерде ок та ортак бир патшалык сынавы – ЕГЭ-ди яптырувдынъ ягын тутатаганын билдирди. Депутаттынъ айтувы ман,
ЕГЭ окувшылардынъ билимлер уьшин алатаган белгилерин йокка эсап этеди.
Муннан сонъ депутатка соравлар берилди эм ол солардынъ баьрисине де тийисли яваплар кайтарды. Айтпага, Кадрия атындагы мектебтинъ директоры Альфия Акимова Хамзаевке разылык билдирди эм мектеб меканына 110 йыл эм ол аьлиги заман талаплавларына келиспейтаганын белгиледи. Болса да мектеб заман ман бирге абытламага шалысады. Депутат бу мектебте эки кере болганын эм сонынъ маьселесин шешпеге шалысаягын билдирди.
Йолыгыста А.Джанибеков атындагы мектебтинъ директоры Курасхан Ярикбаева да Султан Хамзаевке мектебти ярастырув ислери уьшин эткен кыйынына разылык соьзлерин айтты.
Ол тезден янъы окув йылы басланып, балалар янъыртылган мектеб меканына, оьзлерининъ ийгилендирилген классларына уьйкен суьйиниш пен келеегине сендирди. Терекли-Мектеб авыл яшавшысы Антон Лыков район орталыгындагы эм баска авыллардагы кокыс
йыйылатаган ерлерди бир йорыкка келтируьв акында маьселеди козгады. Депутат оьз ягыннан бу маьселе сав республика уьшин маьнели экенин белгиледи. Болса да 20 йыл
артында йыйылган кокысларды 3 йылдынъ ишинде кутармага авыр, ама регионда бу программа барабара ислеп баслар эм сорав шешилер деген явапты берди Хамзаев.
«Шоьл тавысы» республикалык газетасынынъ бас редакторы, Султан Хамзаевтинъ коьмекшиси Эльмира Кожаева да оьз ягыннан депутатка разылык соьзлерин айтты, ол баьри де баска дережели депутатларга коьре районга йыйы келетаганын, мундагы коьп соравлар ман кызыксынатаганын эм соларды шешпеге шалысатаганын белгиледи. Ол газетадынъ редакциясы оьткен йылларда эки ийги фильмлер шыгарганын айтып, эндигиси дуныядай уьйкен оьнерли эм замансыз яшавдан кеткен ногай Акыны Алибий Романов акында фильм аьзирлемеге керегин эм депутат сондай маьнели иске коьмегин эткенин тиледи. Хамзаев соны эс берип тынълады эм колыннан келген ярдамын этеегин билдирди.
Терекли-Мектеб авыл яшавшысы, предприниматель-подрядчик Арслан Тангатаров (онынъ бригадасы район паркында волейбол майданын курады) Ф.Капельгородский атындагы паркын ийгилендируьв акында соравды коьтерди. Султан Хамзаев оны берген соравы уьшин мактады эм эндиги юма Махачкалага бу соравды айырым кепте ойласувга келмеге шакырды.
Йолыгысты тамамлай келип, депутат баьрине де разылыгын айтты эм соны ман бу йолыгыс
кутылмайтаганын, ога аьр ким де аьр заманда да сорав бермеге болатаганын билдирди. Сол ок заманда ога Ногай районы бойынша коьмекшилер керегин де анълатты. Район басшысы Джамалутдин Эсиргепов депутатка разылык соьзлерин айтып, район администрациясы атыннан ога Дагестаннынъ эм Россиядынъ оьрленуьви уьшин исинде етимислерди йорады.
Сол куьн Султан Хамзаев эки мектебти барып тергеди. А-Х.Джанибеков атындагы мектебте этилинген ислер мен макул болды, тек спортзалды ярастырув куллыкларды алгасамай, сапатлы толтырмага керегин белгиледи. Муннан сонъ ол Батыр-Мурзадагы мектебтинъ
«Билимлендируьв» проекти бойынша курылып турган 100 орынлы янъы меканында болды. Курылысты караятып, депутат курувшылар исинде йиберилген бир неше кемшиликлерди коьрсетти. Султан Хамзаев бакшалар шашылган кырларда да болып, ногай бакша усталарынынъ куллыгын коьрди. Сол ерде бир уьйкен карбызды татып, ол кумда оьскен
карбызлардынъ аьлемет ийги даьмин белгиледи.
М-А.Ханов.
Суьвретлерде: РФ Госдумасынынъ депутаты Султан Хамзаев – Ногай районында конакта.