Аьлиги яшавымыз бизди эм оларды эки кесекке боьлди: биз 2022-нши йылда тылда калдык, олар – фронтта, куьн сайын да топлардынъ атувлары, согыс техникасы янатаган эм аьскершилер алдыда туратаган сызыкта, бала шагындагы кинодагы тувыл, а тувра тири душпан ман согысатаган ерде. Олар сол бала куьнлеринде тезден, тап Уллы Аталык
согысындагы атайларындай болып, Тувган Элди, онынъ эркинлигин эм бойсынмаслыгын коршаламага кетееклери акында эш ойламаганлар. А яшав баьри затты да туьрлендирди:
кинодагындай душпанларды олардынъ алдына аькелип салды.
Ногай районынынъ Червленные Буруны авыл яшавшысы Мурат Суюнов бу авылда тувып оьскен, мундагы аьр бир оьленшоьп эм шымшык торгайдынъ оьзи де ога коьптен
таныс эм ювык. Мунда ол орта мектебин окып биткен. Бала заманыннан авыл исине, айванларга суьйимлиги болган яс аьдем мектебтен сонъ фермер хозяйствосы ман каьр шегип баслайды. Конъысы Кизляр районынынъ Сраждинавылыннан (алдынгысы Выше-Таловка) оьзи яраткан кызга уьйленеди. Аьлиги заманда олардынъ коьп балалы аьелинде бес аьвлетлери тувып оьседилер: 3 увылы ман 2 кызлары. Олардынъ аьели аьлиги
заманларда Кара-Су авылына коьшип, сонда яшайды. Атасы – тийисли тыншаювында, анасы ерли мектебте куллык этеди. Мурат Суюнов согыс спецоперациясы ерине оьз
ыхтыяры ман Россия Коршаланув министерствосы ман контракт туьзип, былтыр октябрь айында Махачкаладан йолланады. Ога дейим де бу йигерли эм кайратлы аьскерши, конъысы Шешен Республикасында юрип, хыйлы согыс сулыбын алган эди.
Быйыл канътар айында Мурат аягына яраланады эм госпитальде эмленеди. Увыт айында ол уьйине кыска заманлы отпускка келип кетеди. Буьгуьнлерде, ян косагы Нурбийке
айтканлай, аягындагы ярасы биткен эм, ол – тагы да оьзининъ фронт йолдаслары ман бирге СВО еринде. Юмада эки кере кардаштувганлары, аьели мен телефон аркасы ман байланыс тутады.
Уьйдеги ата-анасы, хатыны эм балалары оны, элбетте, сагынадылар, ама соны ман бирге ол шынты эр эм сол себептен аьли тувган еримиздинъ бактысы шешилип турган вакытта ол СВО еринде оларды эм бизди коршалап туратаганын анълайдылар. Олар да эм биз де авыр аьскер куллыгы босына кетпеегине сенемиз. Кыйынлыклар артыннан дайым да енъиллик келеди, кап-каранъа коьз туьркисиз туьннен сонъ ярык танъ атады, куьшли ясын явыннан
сонъ куьн коьзи эм курткашык яркырап шыгады. Буьгуьнлерде сол шаклы да этилинген алал согыс куллыгы, тоьгилген таза кан эм тер, ийгиликке этилинген ярык сенимлик босына пайдасыз кетип болмайды. Келер бизим якларга да сол кыйынлык кутылган ийги
куьнлер, бизим ясларымыз давды кутарып, енъуьв мен тувган ерине кайтарлар.
М-А.Ханов.
Суьвретте: Мурат Суюнов аьели мен.