Аьдем касиети. Онынъ тувган-оьскен ерине коьре кепленеме экен деген сорав меним басымда коьп кере айланган эм айланады. Оьзим сол соравды беремен де, катырып явап тавып болмайман. Шекленуьв алдымда турады. «Дурыс, тувра» деп айткым келеди эм сога ыспатлар да излеймен, тагы да «Ама» деген де коьз алдымда толкынласып кетеди…
Солай неге болатаганын да айтайым. Аьр кайсы согысларды алып карайык, йигитлик эткен аьскершилер, баьтир атларга етискен аьдемлер саны аз тувыл. Солардынъ коьбиси мунавдай патриотлык тербия берилетаган ерде тувып-оьскен, йогары билим бир дережели ерде алган деп айтып болмайсынъ, неге десе не шаклы атаклы аьскершилер, сол шаклы туьрли ерлерде тувыпоьскен боладылар…
Согыс спецоперациясы. Биринши Россия Баьтири деген атка мунда бизим тав якларда тувып-оьскен аьдем тийисли болды. Оьктемсиймиз, аты дайымларга дагестанлы халкымыз, Элимиз арасында калды…
Сондай йигитлердинъ аьрекетин коьргенде, ойлайсынъ, патриотизм сезимлери бизим яктынъ аьдемлерининъ аян касиети деп. Терен патриотлык сезимлери болган йигит эди бизим ердесимиз, Ногай районымыздынъ Куьнбатар авылынынъ айлак аз яшав болжалын оьткен йигити Астемир Адиль увылы Отарбаев. Ол согыс майданында алдына салынган
борышларды толтырувда, Элин коршалавда яс янын берди.
Яшав оьмирининъ 19-ншы йылында онынъ юреги токтады… Коьп зат
акында ол ойлаган эм алдына салынган мыратлары да аз тувыл эди: ярасык
наьсипли яшав, уьйкен аьелди курув, элди кезуьв… Баьриси де яшавга энмей калган мыратлар, сол куьн яркыраган ногайымнынъ бир юлдызы соьнди. Калды йигиттинъ эткен иси, данъкы халкына. Яшаяк энди эс ювыклары арасында, кишкей карындасынынъ коьз алдында эм анасынынъ кайгы баскан юрегинде…
Анасы Луизадынъ билдируьвине коьре, Астемир алдына салган мыратларына етисип болган бала эди, ол Эл алдында оьзининъ киели борышын толтырувга шыгады эм сонда контрактлы ис аьрекетти бардырмага карарды оьзи алган.
Астемир Адиль увылы Отарбаев 2006-ншы йылдынъ курал айынынъ 18-нши куьнинде дуныяга энген эди. Онынъ бала шагы, яслыгы (коьп узакка созылмаган болса да) тенълериннен баскаланмаган. Онынъ буьгуьнги йигерлиги эм йигитлиги – алдыдагы
несиллерге ийги коьрим. Ол оьзининъ яслыгына карамастан, Элди коршалавдынъ алды бетинде турды. Аьскер сыраларында согыс спецоперациясынынъ алдышылыгында болып, батальоннынъ штурмовой ротасында гранатометчик ис аьрекетин бардырган.
Ол, оьзининъ яшаган заманына карамастан, каты касиетин, йигерлигин йолдаслары арасында коьрсетпей калмаган. Ис йолдаслары арасында сый-абырай ман да пайдаланган.
Астемир йигерли аьлде оьлимсизликке абытлады. Бу куьнлерде де онынъ йолдаслары ис аьрекетин, аталардынъ асабалыгын бардырадылар – элди коршалайдылар… Солардынъ аьр бириси Элимизде кавыфсызлыкты тутув уьшин куьш-куватын аямайды.
Сонынъ акында Россиядынъ Президенти Владимир Путин де оьзининъ бир соьйлевинде булай деген: «Аьр кайсы аьскерши де: офицерлер, оьз ыхтыяры ман кеткенлер, мобилизованныйлар, баьриси де СВО еринде оьзлерининъ йогары аьдемлик сапатларын коьрсетедилер. Олар, бир аьелдинъ аьдемлериндей болып, тынышлы халк уьшин, олардынъ эркинлиги уьшин яв ман куьрес бардырадылар. Канларын да, янларын да аямай, Элдинъ Эркинлиги уьшин согысадылар…». Сол соьзинде РФ Президенти патриотизм де россиянлы халктынъ табиаты ман келген сезим экенин айткан.
Сол сезим бизим Астемирйигитимизде де уьйкен оьлшемде эди. Йигиттинъ данъкы халкы арасында оьмирли.
Галима Курганова,
РФ Журналистлер союзынынъ агзасы.
Суьвретте: Астемир Отарбаев.