Ногай район орталыгы Терекли-Мектеб авылынынъ А.Джанибеков атындагы орта
мектебининъ меканында эм азбарында капиталлык ярастырув ислери ызына якынлап
келеди.
Бу яваплы куллыкларды генераллык подрядчик «Монолит групп» ООО Ислам Абдулаевтинъ етекшилиги мен яшавга шыгарады. Мектебтинъ 3 шарлаклы меканы 1979-ншы йыл сентябрь айында кулланувга берилген эм, соннан бери бир неше ярастырув ислерди эсапка алмасак, мунда уьйкен толы капиталлык ислери юритилмеген деп санамага да болады. Быйыл язлыктан алып меканнынъ ишинде де, кырында да хыйлы куллыклар этилинип келедилер. Айтпага, мектебтинъ кыры плиткалар ман ябылады, иши де янъыдан, заманга келисли кепте туьзетиледи, саьнелерге эм аьр бир кабинетлерге люминесцентли ярыклар салынган, капылары авыстырылган, полларга линолеумлар тоьселген. Бу ерде буьгуьнлерде халк арасында «уьйкен школадагы класслардынъ агаш полларын алып, линолеумлар тоьсейдилер» деген хабардынъ яйылувына мектеб директор Курасхан Ярикбаева булай деп яваплайды: «Бу линолеумларды СанПин кенъеси мен мектеб
классларынынъ полларына салмага ыхтыяр берилген. Сондай линолеумлар, айтпага, Кумлы авылдынъ мектебининъ янъы меканына салынганлар». Мектебтеги йылытув тармагы да янъысына авыстырылган, эндигиси сантехника тармакты да янъыртып кутарадылар.

Директор К.Ярикбаевадынъ айтувы ман, буьгуьнлерде терроризмге карсы коршаланув
бойынша (АТЗ) мектеб ишине эм кырына видеокамералар, от туьсуьв акында билдиретаган алатлар салынадылар. Аьли мектеб ишине «Движение первых», «Орлята России» деген
стендлер орынластырылып туры.
Мектеб етекшиси туьнегуьн мунда интерактивли такталар, ноутбуклар, керекли алатлар
аькелингенин, буьгуьн муьлк келтирилееги акында билдирди. Ярастырув куллыкларды Махачкаладан, конъысы Шешен Республикасыннан келген курувшылар бригадалары
юритедилер.
Директор К.Ярикбаевадынъ айтувы ман, капиталлык ярастырув ислерининъ хыйлысы янъы окув йылынынъ басланувына, Билимлер куьнине дейим битирилмеге каралады.
М.Ханов.
Суьвретлерде: мектеб меканында.