Быйыл язлыктан алып Ногай район орталыгы Терекли-Мектеб авылындагы эки белгили «Юлдыз» эм «Айсылув» балалар бавларынынъ меканларына капиталлык ярастырув эм азбарларын коьрклендируьв ислери басланып юритиледилер.

Бу айтылган куллыкларды Ногай район администрациясынынъ капиталлык курылыс боьлиги МКУ буйымлаган, ислерди болса генераллык подрядчиги «Доверие» ООО яшавга шыгарады. Эки де балалар бавларындагы капиталлык ярастырув ислерининъ юрислери
уьшин прораб Муслим Магарамов яваплы деп саналады. «Юлдыз» балалар бавынынъ меканы 1960-ншы йылда курылып кулланувга берилген. Сол заманнан бери, 2000-ншы
йылда этилинген асханадагы капиталлык ярастырув ислерин санамасак, мунда бир кере де
уьйкен капиталлык ярастырув ислери юритилмеген. Бу бавдынъ меканы кара кербиштен
курылганга эм сонынъ кайбир ерлери авариялык аьллеринде болганы ман байланыста курувшылар эски меканды бузып тайдырдылар эм янъыдан фундамент куйып, янъы кербишлер мен калап баслаганлар. Калавды кутарган сонъ, меканнынъ тоьбесин ябаяклар эм сол ок заманда янъы терезелер де олтыртаяклар. Мунда соны ман бирге бавдынъ тоьгерек ягындагы азбары да янъыртылады.
«Айсылув» балалар бавы авылдынъ куьнтувар ягында орынласкан, ол алдынгысы Ленин атындагы совхозынынъ исшилери уьшин турак уьйлер эсабында салынган болган. 1960-ншы йылдан алып балалар бавы эсабында кулланылып басланган. Сол йылдан бери мунда да бир кере де капиталлык ярастырув куллыклары юритилмеген.
Быйыл язлыкта бавдынъ меканынынъ эски шифер мен ябувлы тоьбесин алып тайдырдылар эм янъысы ман яптылар, тамларын йогары коьтердилер, кыр эм иш бетлериннен янъырттылар.
Аьлиги заманда мунда бавдынъ канализациясын янъыдан салдылар, балалар уйклайтаган
боьлмелерге капылар олтырттылар. Ярастырув ислери бираз созылганга, республикадынъ
Авыл хозяйство министерствосыннан косымша курылыс бригадасын йибермеге соьз бергенлер.
М-А.Ханов.
Суьвретте: авыл ортасындагы «Юлдыз» балалар бавы ярастырылады.