Йыл сайын бизим элимиз 22-нши августта Россия Федерациясынынъ байрагынынъ
куьнин белгилейди. Сол белги астында эл тарихи язылган, йигитликлер этилген эм
Аталыгымыздынъ бойсынмаслыгы сакланган. Бу эстеликли куьн алдында Кизляр районынынъ Шаумян атындагы мектебининъ «Движение Первых» козгалысынынъ белсенли агзалары «Классные встречи» Савлайроссиялык проектининъ катнасувшылары болдылар. Онда конак эсабында согыс спецоперация катнасувшысы, согыс урыслар ветераны Виктор Жарков ортакшылады.
Бу йолыгыс патриотизм, гражданлык борыш эм оьз элинъе суьйимлик акында
хабарласувга айланды. Сыйлы конак Виктор Жарков басыннан оьткерген оьзгерислер акында боьлисти, оьзининъ аьскерлик йолы акында хабарлады эм окувшылардынъ коьплеген соравларына яваплады. Окувшылар болса тувган ерин коршалавдынъ маьнелиги акында, тоьбеде тынышлы аспанды саклав кереги бас орында туратаганы эм шынты патриот болув дегенди юреклерине аян синъдирип анъладылар. Шарадынъ бас коьриниси эсабында «Биз – Россия гражданлары!» Савлайроссиялык программасы бойынша ясы еткен балаларга шатлыклы аьлде паспортлар тапшырув шарасы болды. Элимиздинъ алты яс гражданлары Виктор Жарковтынъ колыннан оьзлерининъ биринши эм энъ маьнели маглуматын алдылар. Паспортты байырлав вакыты – аьр аьдемнинъ яваплылыгынынъ янъы дережесин эм уллы патшалыктынъ яшавшысы экенлигин белгилейтаган шагы болады.
Э.Кожаева.