Ямало-Ненецкий округынынъ Новый Уренгой каласынынъ 50 йыллык мерекеси алдында
савлай Россия эм баьри ногай дуныясы бойынша суьйинишли билдируьв белгили болды: шахматлар бойынша IPCA XXIV дуныя чемпионатында савлыгы ягыннан етиспевлиги бар 20 ясларына етпеген кыскаяклылар арасында бизим ногай кызымыз Амина Кумратова (суьвретте) алтын медалин казанды.
Новый Уренгойдан 19 ясындагы шахматисткыз шарада ортакшылаган 18 эллерининъ 89 катнасувшылары арасында энъ ийгиси эди.
– Амина Кумратова спорт пан 5 ясыннан алып каьрлеген. Ол – бек талаплы кызалак. Баслап биринши етимислерге етискен ол ялдавда, сонъында – баска спорт кеплеринде (айтпага,
теннис, дартс). 2015-нши йылдан алып шахматлар эм шашкалар ойынлары ман кызыксынады, он йыллар узагында кала, округ, савлай россиялык эм халклар ара ярысларында катнаскан. Туьрли дережели 120-дан артык савгалары бар, Новый Уренгой
каласынынъ, Ямало-Ненецский автоном округынынъ, Россиядынъ йыйылма командасынынъ сырасына киреди. Шашкалар бойынша дуныя чемпионы эм Европадынъ куьмис медалининъ иеси болады, шахматлар бойынша – дуныя чемпионы, – дейди Амина Кумратовадынъ тренери Тимур Курмангулов. Ол – Новый Уренгой каласынынъ Константин Еременко атындагы спорт школасында – преподаватель. Спорт тармагында коьптен кыйын салады: «Стрелец» клубында, «Садко» реабилитационлык орталыгында тренер болып куллык эткен, аьли де келеектеги чемпионларды тербиялавга куьшин аямайды. Ис аьрекетининъ сырагылары сол: оны ман каьрлеген 20 спортсменлер Ямалдынъ эм Россиядынъ йыйылма командасы сырасына киредилер.
Хаирбек Алакаев.