Бу макаламды йогарыдагы кепте атаганым босына тувыл. Аьлиги заманга келисли туьзилетаган яшавымызга кирген туьрленислердинъ баьрисининъ пайдалыгы бар ма
деген ойга келесинъ, «пайдасы коьп пе яде зыяны ма?!» — деген сорав да тувады.
Айтпага, янъы технологиялар аркалы кулланувга кирген мобильли телефон баьрисине де пайда бермейди…
Элбетте, телефон аьдем яшавында онъайлык туьзеди. Онынъ кулланувга кируьви мен
биз оьзимизге керек аьдемди бир-эки такыйка ишинде излеп табамыз, оны ман байланысты тутув да бир маьселе де туьзбейди. Аьли мен бу темады коьтеруьвимнинъ
де, сол баягы кепте айтсам, босына тувыл.
Янъы технологиялар заманы. Аьр кайсымыз да куьн ишинде социаллык тармакларга кирмеймиз, дуныядагы болган, болатаган затлар акында билдируьвлер мен кызыксынмаймыз десем, сол да оьтирик эм ялган. Киремиз, излеймиз, табамыз, хабарлаймыз…
Сол бир кызыксынып, социаллык тармагына киргенде, коьзиме – эндигиден армаган тыншаюв лагерьлеринде мобильли телефонларды кулланувга тыйдажылык салынаяк, – дегенди коьрдим эм соны дурыс деп те санайман.
Лагерьге балалар тыншаймага барадылар, а телефон оларды айлак куьшли аьвликтиреди. Аьвлигуьв де кайдай да болады, бар социаллык тармаклар – пайдасызлар, солар
зыян бермесе, пайдасы йок. Бар араларында билимди кенъейтпеге
болатаганы да… Мен таныс болган социаллык тармактынъ билдируьвине коьре, заман болжалын оьлшемей, мобильли телефонларды кулланув, балалардынъ тербиясына, билимининъ кенъеювине, олардынъ патриотлык сезимлерин теренлетуьвге ийги косымын этпейди. Сога коьре, ортак тыншаюв ерлерде болган балаларга телефонларды кулланув заманы болмага керек экенин айырып, кагыйда этип алмага ниет этедилер… Соны тийисли йорык этип беркитсе, бек яхшы болаяк эди. Айтып озайым, мектеблерде де мобильли телефонларды кулланувды койдырмага ниетленедилер эм айтадылар, ама окувшылардан гаджетлер аркалы этилмеге керек коьп затларды талаплайдылар. Сол да аьдемди саьспеклетеди…
Солай болганда, мобильли телефоннынъ пайдасы ма, зыяны ман коьп…
Г. Курганова.