Быйыл Дагестан Республикасынынъ Ногай районынынъ Терекли-Мектеб авылынынъ А-Х.Джанибеков атындагы мектебининъ окытувшылары, окувшылары эм олардынъ
ата-аналарына куванышлы эди 1-нши сентябрь куьни. Ярастырув куллыклардан сонъ мектеб капыларын ашты балаларга. Олар ярастырылган классларда окып басладылар.
Мектебтинъ сыйлы конаклары Россия Баьтири, россия патшалык эм согыс аьрекетшиси Магомед Баачилов, ДР Билимлендируьв эм илми министерствосынынъ информационлыканалитикалык орталыгынынъ директоры Абдулмажид Ибрагимов, «Ногайский район» МР аькимбасынынъ орынбасары Рашид Шангереев, ерли Ямагат палатасынынъ председатели Эльмурза Саитов болдылар. Быйыл биринши класска
85 окувшылар бардылар. Россия эм дагестан байракларын коьтермеге сый Россия Баьтири М.Баачиловка эм окытувшылык тармагынынъ ветераны Р.Оразбаевага этилинди.
Шыгып соьйлегенлер баьрисин де янъы окув йылынынъ басланувы ман кутлап, уьстинликлер йорадылар. Магомед Баачилов мектеб директоры ман баьри классларды карады, ярастырув куллыкларын йогары дережеде этилингенин белгиледи, сондай ярасык,
яркын классларда окувшылар берк билимлер алсын деп йорады. Айырым савбол данъклы
ердесимиз окытувшылар коллективине айтты. Биринши класстынъ окувшылары ятлавлар айттылар, анъ дерисининъ окытувшысы Фарида Исхак кызы Аджиева унык кызы ман мектеб акында йыр йырлады. Оьз соьйлевинде мектеб директоры Курасхан Джумагельди кызы Ярикбаева ярастырув куллыкларында катнасканларга савбол соьзин айтты. Бу проект кимнинъ баславы ман болганын да белгиледи, ДР Аькимбасы Сергей Меликовка,
алдынгы Авылхозяйстволык эм азык-туьлик министри Мухтарбий Аджековка, РФ Госдумасынынъ депутаты Султан Хамзаевке айырым разылыгын билдирди.
Биринши занъды 11-нши классынынъ окувшысы Ислам Мусаев эм 1-нши классынынъ
окувшысы Келдимурат Койлакаев бердилер. 1-нши сентябрь байрамы шатлыклы аьлде оьтти.
Г.Бекмуратова.
Суьвретте: Россия Баьтири М.Баачилов.