Россияда программист куьни 2009-ншы йылдан алып белгиленеди. Бу кеспи байрамы Россия Федерациясынынъ байланыс эм коьлем коммуникация министерствосынынъ баславыман Президенттинъ буйырыгына коьре беркитилген эм йылдынъ 256-ншы куьнинде – 13-нши сентябрьде, високосный йыл – 12-нши сентябрьде белгиленеди.

Программисттинъ исининъ емиси мен биз саьат сайын расамыз. Медицина, маданият, билимлендируьв – баьри ерде электронлы алатлар кулланыладылар. Программист – аьдем яшавынынъ тармакларын сондай да кенъ алатаган кеспилерининъ бириси. Йыл сайын сол кеспи иелери дуныяга яшавды енъил эм онъайлы эткен янъы программалар, сервислер савкатлайдылар. Айтып озайык, программистлердинъ россия мектеби дуныяда энъ де ийги деп саналган эм саналады. Савлай элимизде билимли программистлер куьшин салып аьрекет этедилер.
Бизим Ногай районында да бу тармакта, яс болса да, билими мен, талабы ман сукландырганлар йок тувыл. Солардынъ бириси – Эмиль Башиев. Ол, Ногай район администрациясында оператор
болып куллык эткенли янъы бир йыл болса да, оьзин ийги яктан коьрсетип, исинде алдыга йигерли
абытлар алып, оьз сулыбын оьстирип барады. Яс Нариман авылында тувган, Сургут каласында мектебте окыган. Ол кишкей заманнан алып техника ман кызыксынган, конструкторлар эм техникады кайтадан йыйнамага суьйген. Эмиль Башиев мектебте окыган йыллардан алып программистке керекли болган технический окув сабакларында уьстинликлер коьрсеткен. Ол математикадан олимпиадаларда катнасып, савгалы орынларга тийисли болган. Мектебтен сонъ яс «Технополис» косымша билимлендируьвининъ муниципаллык автономлы билимлендируьв учреждениесинде туьрли курслар оьткен. Аьли болса Сбербанктан «Школа 21» цифровой технологиялар эм программирование кампусында билимин оьстиреди, келеекте Сургут патшалык университети мен яшавын байланыстырмага ниет этеди.
– Энъ де кызыклы этип мен компьютер технологиялар эволюциясын санайман. Кайтип аьдемлер оны ойлап шыгарган экен деп сукланатаган эдим, терен тергеген сайын сукланувым да куьшли
бола берди. Бу кеспиди сайлаганыма мен бек суьйинемен, ол меним исим, оьзимнинъ тармагымда
билимимди оьстируьв уьстинде салган куьшим мени арытпайды. Солай ок мени программистлер
сообществосы да оьзине каратады. Олар ман оьзинъди шынтылайын эркин этип сезесинъ, айтпага, куллыкка оьзинъди онъайлы этип сезген кийим кийип юрмеге ярайды, дуныядынъ бир шетинде
яшап, оннан неше шакырымлар арман ерде ислемеге боласынъ. Тагы да куллыгынъ ман бирге оьз
суьйген затынъды толтырмага да сенде амал болады. Куьнде эки саьат ислемеге суьесинъме, йол
ашык, тек куллыгынъды толтырсанъ, болады. Бу эркинликке ийги яктан карав керек. Оннан буршавлык болмайды, ол тагы да билиминъди терен эм кенъ этпеге, янъыды таппага, сезбеге, мыратларга етиспеге косымша амаллар береди. Бу тармакты сайламага суьйген яслар мени дурыс анъласынлар, сол шет-кырыйсыз амаллар алдында мектеб йыллардан алып каныгыслы ис эм билимге ымтылыс турады, – деп боьлиседи оьз ойлары ман Эмиль Башиев.
Яслардынъ алдында баьри йоллар да ашык деп биз коьп айтамыз. Шынтылайын да бизим элимизде
солай. Яслар патшалыгымыздынъ оьрленуьв йолларын, келеектегисин белгилееклер. Талаплы ясларга карап, регионымыз эм элимиздинъ онъайлы келеектегисине шекленмеймиз.
Яс специалист Эмиль Башиевке мыратлары толганын эм басамактан басамакка оьз тармагында
уьстинликтинъ энъ де бийигине етискенин йораймыз.
Нурият Кожаева.
Суьвретте: Э.Башиев.