Дагестан халкларынынъ бирлик куьни 2010-ншы йылдынъ 15-нши декабринде Дагестан халкларынынъ уьшинши курылтайында беркитилген. Сол замандагы республика президенти Магомедсалам Магомедовтынъ буйырыгы ман ол йылсайын 15-нши сентябринде белгиленеди. Байрам куьн савлай республикада шатлыклы шаралар озгарыладылар, онынъ алдында мектеблерде, китапханаларда патриотлык эм класс саьатлер, выставкалар уйгынланады.
Кадрия атындагы мектебинде Дагестан халкларынынъ бирлик куьнине багысланып фестиваль оьтти. Шарады мектеб етекшисининъ исин кесек заманга юритуьвши Марина Межитова ашып, йыйылганларды кутлады.
– Дагестаннынъ куьши – халклар бирлигинде. Бу байрам тувган еримизге каратылган суьйимимизди белгилейди эм бизим ямагатлыктынъ бас маданияттарих аьдетин – Дагестан халкларынынъ татымлыгын эм бузылмас бирлигин беркитеди. Биз халклар ара татымлык эм бир-бирине коьмек этуьвди асабалыкка калдырган ата-бабаларымыз бан оьктемсиймиз. Аьр бир несил оьз Тувган ерин, Элин ийги этпеге шалысады. Сиз, балалар, тувган республикадынъ онъайлы келеектегиси уьшин, халклар ара тил бирликти саклавга баьри куьшинъизди, амалларынъызды кулланаягынъызга сенемиз, – деди ол оьз соьзинде. Фестиваль барысында 2-8-нши класс окувшылары бир туьрли халкты ваькилледилер, олар ногай, даргин, орыс, мышыгыз, азербайджан эм баска халкларынынъ миллет кийимин кийип, биювлерин коьрсеттилер, ятлавлар окыдылар. Солай ок бу куьнги шарада ногай халкынынъ балады бесикке салув эм баска аьдетлери коьрсетилинди. Сонъ 9-11-нши класс окувшылары оьзлери курган берекетке мол сыпырадагы миллет аслар акында айтып, олар кайтип аьзирленетаган йосыгы ман да боьлистилер. Сонъында ДР ат казанган артисти Альмира Тунгатарова фестиваль эм балалардынъ биюв оьнерлерин коьрсетуьви бойынша оьз ойларын айтты. Шарадан балалар да, келген конаклар да йогары коьнъили мен кайттылар.
Дагестанлылардынъ бирлиги – ол бизим бас байлыгымыз. Бир болган шаклы бизге бир сынав да коркынышлы тувыл.
Н.Кожаева.