Дагестан Республикасынынъ Аькимбасы Сергей Меликов бир неше куьнлер узагында «Каспий – 2025» деп оьткен яслар форумынынъ ябылувына багысланган  шарадаортакшылык этти. Мунда патриотизм, волонтерлар, янъы технологиялар эм сондай баска тармаклар бойынша проектлер коьрсетилдилер.
Белгилеп озайык, ДР Избербаш каласында оьткен «Каспий– 2025» форум Россиядынъ туьрли регионларыннан эм шет эллерден 500 катнасувшыларды йыйнады.
Шарадынъ маьнели оьзгерислерининъ бириси – ДР Аькимбасы Сергей Меликовтынъ эм Росмолодежь етекшиси Григорий Гуровтынъ Аллея проектинде дагестанлы яслардынъ янъы ой-ниетлери мен таныстырувы.
Бу форумнынъ ашыклаган темалары кенъ эди, ама уьйкен эс яслардынъ патриотлык тербиялавына этилди. Солай ок, Уллы Енъуьвдинъ 80 йыллык мерекесине, цифровой ямагатында яслардынъ орыны темасы да маьнелилер санында эди. Мунда ортакшылык эткен аьдемлер терен маьне берип тарихли эсти караткан «Наследники Победы: путешествие по местам боевой славы» деген проектке карадылар.
Оннан баска болып, форум катнасувшылары Уллы Енъуьвдинъ 80 йыллыгына багысланган, Кавказ уьшин Урыслар согыстарихли эпизод реконструкциясын коьрсеттилер.
ДР Аькимбасы Сергей Меликов Уллы Аталык согысында катнасканлардынъ эсин оьмирлетер уьшин аьрекет бардыратаган «Кавказ» излев отрядынынъ куллыгына йогары баады берди эм бу организацияды коьтергишлев шаралар планын туьзбеге тапшырды.
Шара барысында регион етекшиси республикадынъ оьрленуьвине СВО катнасувшыларынынъ сулыбы уьйкен косым этетаганын эм сол сулып республикамызда ясларды тербиялавда кулланув керегин белгиледи. Солай ок республикада власть органларында Ашык эсиклер куьнин уйгынламага керегин айтты, сонынъ
бас темасы – окувшыларга кеспи сайлавда коьмек болсын. Форумнынъ тамамында социаллык баславларды яшавга шыгарувшы яслар проектлерининъ Савлайроссиялык шараларында енъуьвшилерине грантлар тапшырув ман тамамланды.