СВО ветеранларынынъ эм катнасувшыларынынъ тынышлы яшавына уьйренуьвге каратылган «Доблесть гор» республика бойынша программадынъ биринши кезеги
тамамланды. Программадынъ 35 катнасувшылары очно кебинде эки юма ишинде тезлик уьйренуьвлерин оьтип, янъы кезегине шыктылар. Буьгуьнлерде олар сулыплы етекшилерининъ колында уьйренуьв мырат пан министерстволарда, ведомстволарда эм организацияларда стажировка оьтедилер. Айтпага, Кизляр район администрациясынынъ аькимбасы Аким Микиров согыс оьзгерислерининъ ветераны, согыс спецоперация катнасувшысы Айгум Ногаевтинъ насихатшысы
болаягын билдирди. Сондай баслав бойынша Микиров гражданлык яшавга етимисли кайтув йолында оьз амалын этпеге эм ога кеспилик мырадларына етисуьвде демевлик этпеге, етекшилев тармагында Ногаев пен оьз сулыбы ман боьлиспеге мыратланувын билдирди. Аким Микиров согыс спецоперация катнасувшылары ямагат ягыннан эс каратувда эм коьтергишлевде керексинетаган йигитлери, шынты патриотлары болатаганын да белгилеп озды. Ол Дагестан Республикасынынъ эм Кизляр районынынъ оьрленуьвине оьз уьлисин косувда эм олардынъ анъ- акыл байлыгын яшавга шыгарувда, ямагат ишинде оьз орынын излестируьвде ветеранларга ярдамласув бек маьнели экенин белгиледи. Дагестанда яшавга шыгарылып баслаган «Доблесть гор» программасы ямагат аьрекетине белсенли кирисуьвине эм социаллык уьйренуьвде ярдамласувда согыс спецоперация катнасувшыларын кайсы яктан да коьтергишлевге каратылган. Сол программадынъ маьнели кесеклерининъ бириси – насихатшылык – сулыплы етекшилериннен алып ямагат аьрекетшилерине дейим оьз билимин эм сулыбын коьшируьвди канагатлав болады.
Суьвретте: Аким Микиров етекшилев сулыбы ман СВО катнасувшысы ман боьлисуьв мезгили.