Уьстимиздеги йылдынъ кырк кийик айынынъ 27-нши куьнинде Ногай районымыздынъ Куьнбатар авылында Уллы Аталык согысынынъ 80 йыллык мерекесине багысланган шатлыклы шаралар оьткерилди.
Сол оьзгерисли шаралар ерли ипподромнынъ янъыртылган атшабыс майданын каравдан басланды. Бу майдан бирден 16 атка шаппага амал береди. Бу спорт шарасында конак эсабында ДР Миллетлер политикасы эм дин ислери бойынша министерство ваькили В.Зеленский, «Ногай район» МР администрациясынынъ
етекшисининъ орынбасары Р.Шангереев, РФ ат казанган маданият куллыкшысы Я.Кудайбердиев, район билимлендируьв боьлигининъ етекшиси А.Межитов, РФ Язувшылар союзынынъ агзасы С.Майлыбаева, предприниматель М. Аджеков эм баскалар катнастылар. Баслапкы хош келди соьзин авыл аькимбасы Замид Яриков айтты, оннан сонъ келген конаклар да авыл яшавшыларын сондай оьзгерисли байрам ман кутладылар.
Аьр кайсы соьйлеген аьдем де Уллы Аталык согысынынъ мерекеси энъ де маьнели куьнлердинъ бириси экенин белгиледи. Солай ок коьп соьзлер регионымызда ат пан каьрлев аьрекетин оьрлендируьв акында айтылды.
Ногай район етекшисининъ орынбасары Рашид Шангереев оьз соьзинде ызгы йылларда бизде атабаларымыздан калган каьрлердинъ бириси –атшылык оьрленетаганын, бу йылдынъ 9 Май куьнинде атшылар Дагестаннынъ сыртыннан кубыласындагы Дербент каласына дейим барганларын да айтты. Сол
бизим халклардынъ дослыгын да коьрсетти эм баска конъысы республикаларга да ийги коьрим болды.
Бу куьн мунда туьрли ерлерден конаклар, атшабыста катнасканлар саны айлак коьп эди. Конъысы Шешен, Кабарты-Балкар Республикаларыннан, Ставрополь крайыннан, Волгоград, Ростов областьлериннен, Калмыкиядан атлылар оьз куьшлерин сынадылар. Оьзгерисли шарады озгарувга Куьнбатар авылда тувып-оьскен, тек бу куьнлерде баска ерлерде аьрекет бардыратаган яслар, атлары бар йигитлер эм ерли фермерлер куьш салдылар.
Солай ок аьр йыл сайын авыл еринде атшабысларды оьткеруьвге АскорАгро компаниясы атшабыс катнасувшыларына айванларын азык пан канагатлайды.
Атшабысты караганлар ишинде Казахстан ериннен де конаклар бар эдилер.
Г. Курганова.