Дагестан Республикасынынъ бас каласы Махачкаладагы Дослык уьйинде Россиядынъ 20 регионыннан Эсап палатасынынъ ваькиллери йолыгыстылар. Бу РФ субъектлерининъ тергев-эсап органларынынъ етекшилерининъ савлайроссиялык йыйынында ДР Аькимбасы Сергей Меликов та ортакшылык этти.
Шара Дагестан Республикасынынъ Эсап палатасынынъ туьзилуьвине 30 йыл толувы ман байланыслы эди. Бу куьн Россиядынъ туьрли регионларыннан келген конаклар туристлик тармакка патшалык колтыклав кайдай косым этетаганын эм сол субъекттинъ социалэкономикалык оьрленуьвине кайдай демевлик беретаганын, солай ок бу тармакка шыгарылган бюджет карыжлары кайтип кулланылатаганы да айтылды.
ДР Аькимбасы Сергей Меликов оьзининъ хош келди соьзинде Россия Эсап палатасы ман ислев регионга коьп пайдасын тийдиретаганын, финансэкономикалык аьрекетте беретаган маслагатлары эм анализи бюджет шыктажларда эм ресурсларды кулланувда уьйкен косымын этетаганын белгиледи.
Солай ок регион етекшиси Дагестанда туризмди оьрлендирмеге коьп мырсатлар барын да белгилеген. Солай болганда мунда янъы ис орынлар да ашпага эм сонынъ аркасы ман предпринимательлик белсенликти де коьтермеге, налог келимин де оьстирмеге амаллар бар.
Бу куьн РФ Эсап палатасынынъ Председатели Борис Ковальчук атыннан дагестан ис йолдасларды федераллык аудитор Наталья Трутнева мереке мен кутлады.Солай ок, ол оьзининъ атыннан республика етекшилерине Дагестанда туризмди оьрлендируьвге куьш салатаганлары уьшин разылыгын билдирди.
ДР Эсап палатасынынъ председатели Билал Джахбаров та республика етекшилерине оьз разылыгын билдирди эм аьли де бирге ис аьрекетти бардырувга аьзирлигин айтты. Сол йыйыннынъ барысында Сергей Меликов Эсап палатасынынъ куллыкшыларына патшалык савгалар тапшырды. Бу мерекели шарадан сонъ, келген
конаклар «Ашык Дагестан» форумына бардылар эм сонда регионнынъ туристлик инфраструктурасы ман да таныстылар. Алдыда ДНР, ЛНР, Запорожье эм Херсон
областьлердинъ тергев-эсап органлары ман ис макулласувларга кол баспага ниетленеди.