Ногай ясларымыз, не ерде болса да, оьз ис кеспилери бойынша куллык этсе де, баска миллетлер сырасында ногай халкынынъ атын, данъкын тийисли айттырып, алдышы орынларына тийисли болып келедилер. Айтпага, Сургут каласындагы Ногай яслардан туьзилген Союзы да Сургут кала, область, савлайроссиялык
бойынша озгарылатаган туьрли шараларда, ярысларда, енъуьвши орынларын бийлейдилер. Айтпага, янъыларда Сургут каласындагы Ногай яслар Союзынынъ командасы «Этнонити» кала проекти бойынша шатраш турниринде, ийги тамамларын коьрсетип, енъуьвши болып шыкты. Турнирде савлайы 10 командалары бир неше саьат бойынша терен билимлери эм акыллылыгы ягыннан сынасып, тиресуьвли ойында ортакшылык эттилер. Бу кызыклы оьзгерис округ бойынша шатраш ойнавшыларына баскалар ман йогары дережеде оьз сулыплары ман авыспага, ойнав оьнерлерин коьрсетпеге уьйкен амалын берди. Шатраш ойынынъ катнасувшыларынынъ эсинде шатрашты уста ойнавшылар ман танысув, ярык коьнъил сезимлерин тувдырган турнир куьни деп аьр бир катнасувшыдынъ эсинде коьпке сакланаягына шек йок. Тиресуьвли ойын тамамында ХМАОЮГРА-дынъ Татар ясларынынъ Союзы – биринши орынга, оьз тизиминде шатраш ойнавшылары Темирхан Зарболганов, Азинет Оразбаева, Махмуд Бекболатов кирген Сургут каласынынъ Ногай яслар Союзынынъ командасы – 2-нши орынга, Дагестаннынъ миллет-маданият команда агзалары – 3-нши орынга тийисли болдылар. Аьр бир катнасувшыга «Этнонитининъ» логотипы ман эстеликли савга, Сый дипломы, кубогы тапшырылды. Сол куьн шара катнасувшыларына шатраш турнири, тек спорт базласы болып калмай, анъ-акылдынъ, миллетлер аралык эм дослыктынъ шынты коьпири де болды. Биз де ногай ясларымызды тийисли казанган енъуьв мен кутлай келип, келеекте де интеллектуаллык эм баска спорт шараларында бийик уьстинликлерге етисип, халкынынъ атын баскаларга тек ийги ягыннан танытканын йораймыз.
Г.Нурдинова.
Суьвретте: шарадан коьринис.